Deniz Güler: BRAF Toplantısında əsas məsələ uşaqların mediada zərərli məzmunlardan qorunmasıdır VİDEO
Bakı, 15 aprel, AZƏRTAC
Müxtəlif ölkələrdən iştirakçıları bir araya gətirən Qara Dəniz Yayım Tənzimləyici Qurumlarının Forumunun (BRAF) 11-ci Toplantısında əsas müzakirə mövzusu uşaqların mediada zərərli məzmunlardan qorunmasıdır. Media sahəsində rəqəmsallaşma ilə yanaşı, bir çox imkanlar əldə olunub, lakin bu proseslə birlikdə ciddi təhlükə daşıyan məzmunlar da yayılmağa başlayıb.
AZƏRTAC xəbər verir ki, bu fikirləri Radio və Televiziya Üzrə Tənzimləyici Qurumun (RTÜRK) sədr müavini Deniz Güler aprelin 15-də Bakıda keçirilən BRAF-ın 11-ci Toplantısında jurnalistlərə açıqlaması zamanı deyib.
O qeyd edib ki, RTÜRK zərərli məzmunları mütəmadi olaraq nəzarətdə saxlayır və monitorinqlər aparır: “Ehtiyac olduqda, bu məzmunlara qarşı inzibati tədbirlər, yəni cəzalar tətbiq edirik. Lakin məsələ təkcə cəza tətbiqetməsi ilə məhdudlaşmır. Eyni zamanda, cəmiyyətin bu mövzuda maarifləndirilməsi də olduqca vacibdir.
Bu məqsədlə Türkiyə Respublikası Milli Təhsil Nazirliyi ilə əməkdaşlıq protokolumuz var. Bu protokol çərçivəsində uşaqlarımıza və müəllimlərimizə rəqəmsal medianın riskləri barədə təlimlər verilir. Həmçinin RTÜRK: Uşaq və Kommunikasiya adlı jurnalımız ildə iki dəfə nəşr olunur və bu sahədə maariflənməyə xidmət edir”.
RTÜRK-ün sədr müavininin sözlərinə görə, televiziya hələ də dominant media vasitəsi olaraq qalsa da, sosial media və rəqəmsal platformalar da böyük ölçüdə istifadə olunur və bu sahəyə də nəzarət artırılmalıdır.
Bölmənin digər xəbərləri
