Abbas Əhmədli: Xaricdə yaşayan həkimlərimizin Azərbaycanda səhiyyə sahəsində reallaşdırılan islahatlara töhfələri Berlin qurultayının əsas mövzularındandır VİDEO
Berlin, 26 aprel, AZƏRTAC
“Almaniyada çalışan azərbaycanlı həkimlərin təşkilatlanması və ölkəmizdə səhiyyənin inkişafına töhfə vermək məqsədilə 2021-ci ilin yanvarında bir neçə həmkarımızla birlikdə Alman-Azərbaycan Tibb İşçiləri Birliyini (DAMV) təsis etdik. Ötən müddətdə həkimlərimizin təşkilatlanması istiqamətində bir sıra layihələr, tədbirlər həyata keçirdik. Azərbaycanlı Həkimlərin Berlin Qurultayını təşkil etməkdə məqsədimiz bu sahədə fəaliyyətimizi daha da genişləndirmək, bir sıra ölkələrdə çalışan həkimlərimizlə müzakirələr aparmaqdır”.
Bu fikirləri Azərbaycanlı Həkimlərin Berlin Qurultayının təşkilatçısı olan DAMV-ın ilk sədri, Hannover və Braunşveyq şəhərlərində özəl klinikaların təsisçisi, plastik cərrah Abbas Əhmədli AZƏRTAC-a açıqlamasında deyib.
Qurultaya marağın böyük olduğunu vurğulayan A.Əhmədli qeyd edib: “Tədbirdə Azərbaycan, Almaniya, Rusiya, Türkiyə və Britaniyada çalışan həkimlərimiz iştirak edirlər. Onlarla birlikdə xaricdə yaşayan həkimlər olaraq Azərbaycanda səhiyyənin inkişafına necə töhfə verə biləcəyimizə dair fikir mübadiləsi aparacağıq, tədbirin sonunda isə qurultay iştirakçılarının adından bəyannamə yayımlayacağıq”.
A.Əhmədli bildirib ki, Prezident İlham Əliyevin diqqət və qayğısı ilə ölkəmizdə səhiyyə sahəsində həyata keçirilən islahatlara xaricdə çalışan azərbaycanlı həkimlərin töhfələri bu gün qurultay çərçivəsində keçiriləcək panel iclaslarında əsas müzakirə mövzularındandır. Bu baxımdan nəzəri və praktiki tibb təhsilinin inkişafı, xaricə və yerli həkimlərin şəbəkələşməsi və onun faydaları, ölkəmizdə səhiyyə xidmətlərinin təşkili və bu sahədə qabaqcıl ölkələrin praktikası nəzərdən keçiriləcək.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
