Elvan Kuzucu Hıdır: Ötən 3 ildə Bilim Mərkəzində 120 min şagird təlimlərə cəlb olunub VİDEO
Quba, 14 may, Elxan Yusifli, AZƏRTAC
2022-ci ildə Bakıda “TEKNOFEST Azərbaycan” Aerokosmik və Texnologiya Festivalını böyük coşqu ilə qeyd etmişdik. Həmin vaxt Prezident yanında Vətəndaşlara Xidmət və Sosial İnnovasiyalar üzrə Dövlət Agentliyi ilə birgə ilk Bilim Mərkəzini açmışdıq. Bununla xalqlarımız arasında dostluq, qardaşlıq əlaqələrimizin daha da güclənməsinə, tarixi və mədəni sahə ilə yanaşı, elm və texnologiya sahəsində də inkişafa töhfə vermiş olduq. “TEKNOFEST Azərbaycan”dan sonra minlərlə azərbaycanlı şagird sonrakı illərdə keçirilən festivallara qatıldı və bir çox nailiyyətlər əldə etdilər. Ötən il festivalda Azərbaycandan 7 komanda mükafatlandırılanlar sırasında yer aldı. Artıq “Bilim Bakı” Mərkəzindəki “Deneyap texnologiya proqramı” üzrə təlimlərə cəlb olunan xeyli məzunumuz var. Ötən 3 ildə 120 min şagird Bilim Mərkəzində təlimlərə cəlb olunub. Bir sıra kənd məktəblərində, o cümlədən Qarabağda yerləşən məktəblərdə olub, şagirdlərin layihəmizdən faydalanmalarını təmin etdik.
AZƏRTAC-ın bölgə müxbiri xəbər verir ki, bunu Bilim Quba Mərkəzinin açılışı zamanı Türkiyə Texnologiya Komandası Fondunun (T3 Fondu) Direktorlar Şurasının sədri Elvan Kuzucu Hıdır jurnalistlərə açıqlamasında söyləyib.
Elvan Kuzucu Hıdır bildirib ki, Bakıda həyata keçirilən birgə layihə regionlarda da reallaşdırılır. “Bölgədə ilk belə Bilim Mərkəzi Qubada açılıb. Burada da uşaqlara riyaziyyat, təbiət elmləri, astronomiya, texnologiya, sahibkarlıq və innovasiya sahələrinə aid biliklər öyrədiləcək, bu sahələrdə müxtəlif layihələrdə iştirak edəcəklər. Burada təlim keçən şagirdlər “TEKNOFEST”ə, başqa beynəlxalq yarışlara qatılacaqlar. Çətin imtahanlar keçən 80 nəfər artıq Bilim Quba Mərkəzində “Deneyap texnologiya proqramı”na cəlb olunub. Seçimlər yüzlərlə şagird arasında aparılıb. Seçilən şagirdlər iki il ərzində ödənişsiz şərtlərlə robototexnika, elektronik proqramlaşdırma, kosmos, enerji texnologiyaları və bir çox başqa sahələrdə təhsil alacaqlar. Bir sözlə, həm Bakıda, həm də Qubadakı Bilim mərkəzlərində şagirdlərə elm və texnologiya sevgisini aşılamaq istəyirik. Ümid edirik, gələcəkdə onların arasından Səlcuk Bayraktar, Əziz Sancar kimi neçə-neçə elm adamları çıxacaq”, - deyə Elvan Kuzucu Hıdır əlavə edib.
Xatırladaq ki, “Bilim Azərbaycan” layihəsi çərçivəsində bu gün Quba “ASAN Həyat” kompleksində yerləşən “Bilim Quba” Mərkəzi fəaliyyətə başlayıb.
Bölmənin digər xəbərləri
