“Nağıllar aləmi İçərişəhər” - YENİLƏNİB VİDEO
Bakı, 1 iyun, AZƏRTAC
1 İyun – Uşaqların Beynəlxalq Müdafiəsi Günü münasibətilə “Nağıllar aləmi İçərişəhər” adlı rəngarəng festival keçirilib.
AZƏRTAC xəbər verir ki, İçərişəhərin müxtəlif guşələrini əhatə edən tədbirlər bütün günü uşaqlar üçün əsl bayram ab-havasına çevirib.
“İçərişəhər” Dövlət Tarix-Memarlıq Qoruğu İdarəsinin təşkilatçılığı ilə keçirilən festival möhtəşəm güllər paradı ilə başlayıb. Şirvanşahlar Sarayı kompleksindən Qoşa Qala meydanına qədər davam edən yürüşdə ümumilikdə 300-dən çox uşaq iştirak edib. Parad Bakı Avropa Liseyinin şagirdlərinin və musiqi qruplarının iştirakı ilə gerçəkləşib.
Qoşa Qala meydanında təşkil olunan əsas səhnə proqramı uşaq kollektivlərinin musiqi və rəqs çıxışları, eləcə də məktəbli rəssamların təqdimatında rəsm plenerləri ilə davam edib.
Əyləncə zonalarında qurulan batutlar, “Panda”, “Feya” və “Sonic” kimi sevimli obrazların canlandırıldığı animator proqramları, karikatura guşəsi uşaqların marağına səbəb olub.
Festivalın iştirakçısı olan balaca dostlarımız AZƏRTAC-a verdikləri açıqlamada sevinc dolu anlarını bölüşüblər.
Doqquz yaşlı Əminə Paşayeva tədbirdə ən çox rəsm çəkməyi sevdiyini bildirib: “Mən böyüyəndə rəssam olmaq istəyirəm. Bu gün buraya gəlmək çox gözəl idi. Günümüz çox rəngarəng və şən keçir”.
Gələcəkdə memar olmağı arzulayan 7 yaşlı İnci Qurban isə deyib: “Mən rəsmi çox sevirəm, evlər çəkirəm. Bu gün bayramdır, hamı şəndir. İçərişəhərdə keçirilən festival çox gözəldir”.
Festival çərçivəsində, həmçinin Qız Qalası meydanı və ətraf ərazilərdə, Dördbucaqlı Qala, Arxeoloji bağ, Qüllə küçəsi, Bakı Fotoqrafiya Evi, Zaman Art Qalereyası, Tahir Salahov və Maqsud İbrahimbəyovun ev muzeyləri kimi İçərişəhərin bir çox məkanlarında rəngarəng proqramlar təqdim olunub.
Qız Qalası meydanında Azərbaycan Milli Konservatoriyası nəzdində İncəsənət Gimnaziyasının təşkil etdiyi “Nağıllar Dünyası” uşaq rəsm sərgisi, Ella Bağırovanın sərgi-satış yarmarkası, eləcə də “Kiçik Ürəklərin Böyük Xəyalları” və “Milli Mətbəxin Palitrası” adlı ekspozisiyalar xüsusi maraq doğurub.
Respublika Diaqnostika Mərkəzinin təşəbbüsü ilə İçərişəhər sakinlərinin və ziyarətçilərin övladları üçün tibbi "check-up" müayinələri aparılıb. Bu sosial təşəbbüs valideynlər tərəfindən yüksək qiymətləndirilib.
Bakı Fotoqrafiya Evində təqdim edilən “Rəqəmsal rənglər” sərgisi, “GameBuzz” şirkətinin kvest və masaüstü oyunları, 4SIM və digər təhsil və incəsənət mərkəzlərinin təqdimatları da festival proqramını zənginləşdirib.
Günün sonunda festival balaca musiqiçilərin çıxışları, “Günay” Uşaq Teatrının “Arşın Mal Alan” tamaşasından səhnəcikləri, eləcə də Azərbaycan Şahmat Federasiyasının keçirdiyi şahmat turniri ilə başa çatıb.
Bu möhtəşəm tədbir bir daha sübut etdi ki, İçərişəhər yalnız tarixin deyil, həm də uşaqların təxəyyül və sevinclə dolu nağıl dünyasının canlı ünvanıdır.
Bölmənin digər xəbərləri
