Bakıda “Diego Rivera: Daha yaxşı gələcəyin vədi” adlı sərgi açılıb VİDEO
Bakı, 15 oktyabr, AZƏRTAC
Meksikanın Azərbaycandakı səfirliyi və Azərbaycan Milli İncəsənət Muzeyinin təşkilatçılığı ilə Diego Rivera Anahuacalli Muzeyinin “Diego Rivera: Daha yaxşı gələcəyin vədi” adlı sərgisinin açılışı keçirilib.
AZƏRTAC xəbər verir ki, tədbirdə çıxış edən Azərbaycan Milli İncəsənət Muzeyinin direktoru Şirin Məlikova sərginin Azərbaycan və Meksika arasında mədəni əlaqələrin daha da möhkəmlənməsinə xidmət etdiyini vurğulayıb.
Onun sözlərinə görə, sərgidə təqdim olunan əsərlər təkcə Meksika incəsənətinin deyil, həm də ümumbəşəri dəyərlərin təcəssümüdür. “Sərgidə Diego Riveranın bədii irsini əhatə edən təxminən 100-ə yaxın fotoqrafik divar rəsmləri, rəsm və eskizlər, eləcə də arxiv fotoşəkilləri və sənədlər nümayiş olunub. Bu materiallar tamaşaçılara XX əsrin ən böyük sənətkarlarından birinin unikal yaradıcılığı ilə yaxından tanış olmaq imkanı verir. Sərginin ekspozisiyası beş əsas tematik bölmədən ibarətdir. Bu bölmələr rəssamın Meksikanın sosial transformasiyasındakı əsas rolunu müəyyən edir. Burada rəssamın incəsənət haqqında düşüncələri, muralist hərəkatındakı mövqeyi, rəssamlıq və memarlığın sintezi və inqilabdan sonrakı Meksikada incəsənətinin ictimai rolu izlənilir, Riveranın Meksika inqilabına, ictimai təhsilə və incəsənətin vətəndaş cəmiyyəti üçün vasitə kimi roluna dair dərin marağını əks etdirir. Riveranın Meksika divar sənətinin aparıcı fiquru kimi necə formalaşdığını, incəsənəti təkcə estetik deyil, həm də təhsil və ictimai şüurun formalaşdırılması vasitəsi kimi dəyərləndirdiyini əyani şəkildə göstərilib”,-deyə Ş.Məlikova əlavə edib.
Diego Rivera Anahuacalli Muzeyinin direktoru Mariya Teresa Moya sərginin təşkilindən məmnunluğunu diqqətə çatdırıb. “Sərgidə iki ölkə arasındakı bənzərlikləri göstərməyə çalışdıq. Riveranın bu əsərləri Meksika xalqına olan sevgisini ifadə edir. Lakin bu sevginin bütün xalqlara şamil olduğunu görmək mümkündür. Diego inanıb ki, incəsənət cəmiyyəti dəyişdirə biləcək gücə malikdir. O, hamı üçün bərabər cəmiyyət görmək istəyirdi. Bu, Diegonun arzuladığı və inandığı idealdır. Riveranın Meksika Milli Hazırlıq Məktəbində işlədiyi "Yaradılış" (1922) adlı divar rəsminə dair fotoqrafik reproduksiyalar sərgi də xüsusi yer tutur. Bu monumental əsər Meksika muralizminin başlanğıcı hesab olunur və Renessans üslubunun yerli motivlərlə sintezini nümayiş etdirir. Riveranın daha sonrakı monumental layihələri arasında Çapingo və Meksika İctimai Təhsil Nazirliyi binalarındakı divar rəsmləri də yer alıb. Bundan əlavə, Meksika şəhərindəki Milli Saray və Kuernavakadakı Kortes sarayında çəkilmiş divar rəsmlərinin reproduksiyaları Riveranın tarixi sosial mübarizə kimi təqdim etmə bacarığını və bu əsərlərdə yerli mədəniyyətə verdiyi önəmi əks etdirib. Riveranın beynəlxalq fəaliyyəti də sərgidə əhatəli şəkildə təqdim olunur. 1933-cü ildə Nyu-Yorkdakı Rokfeller Mərkəzində çəkdiyi “İki yolayrıcında qalan insan” adlı divar rəsmi böyük mübahisələrə səbəb olmuş və əsər məhv edilmişdir. Lakin sənətkar bu rəsmi yenidən Meksikada İncəsənət Sarayında "İnsan, kainatın idarəçisi" adı ilə yenidən yaratmışdır. Bu əsərin sənədli görüntüləri də sərginin xüsusi diqqəti cəlb edən hissələrindən birini təşkil edir. Sərginin mərkəzi bölməsi Riveranın şəxsi təşəbbüsü ilə yaradılmış Anauakali Muzeyinə həsr olunub. Mexiko şəhərində yerləşən bu unikal məkan Rivera tərəfindən layihələndirilmişdir. Vulkanik daşlardan inşa edilmiş muzey qədim yerli irs, müasirlik və gələcək arasında körpü yaratmaq məqsədi daşıyırdı. Sərgidə təqdim olunan memarlıq planları, eskizlər və fotoşəkillər Riveranın mədəni kökləri qoruyaraq gələcək nəsillərə ilham vermək ideyasını dolğun şəkildə göstərir”.
Meksikanın Azərbaycandakı səfiri Mariya Viktoriya Romero Kabalyero qeyd edib ki, bu sərgi iki il əvvəl Meksikanın Anahuacalli Muzeyi və Azərbaycan Milli İncəsənət Muzeyi arasında başlanan əməkdaşlıq layihəsinin nəticəsidir.
Sənətşünaslıq üzrə fəlsəfə doktoru Telman İbrahimov Diego Rivera yaradıcılığının bəşəri dəyərləri əks etdirdiyini və Meksikanın mədəni irsinin ayrılmaz hissəsi olduğunu diqqətə çatdırıb.
Daha sonra qonaqlar sərgi ilə yaxından tanış olublar.
Sərgi dekabrın 30-dək davam edəcək.
Bölmənin digər xəbərləri
