“Minaşirin” narı dünya bazarına göndərilir - Saatlıda innovativ bağçılıq VİDEO
Saatlı, 21 oktyabr, Aydın Yavərzadə, AZƏRTAC
Saatlı rayonu ərazisindəki aqroparkda innovativ texnologiya ilə becərilən nar bağında bol məhsul yetişib. Ölçüsünə və çəkisinə görə çeşidlənən narlar daxili bazarla yanaşı, həm də xaricə satılır. Bu il nar bağlarından 3-4 min ton məhsul gözlənilir. Artıq 2000 tona yaxın məhsul yığılıb və onun 200 tonu xaricə göndərilib.
AZƏRTAC-ın bölgə müxbiri xəbər verir ki, Azadkənd kəndi ərazisindəki aqroparkın yaradılmasında dövlət dəstəyinin önəmli payı olub. Ərazisi 7 min hektardır. Hazırda aqroparkın nar bağında yığım mövsümüdür.
Aqronom Bikə Qurbanova ilə elə aqroparkın ərazisində, nar bağında görüşürük. Deyir ki, gəlişimiz məhsul yığımı dövrünə təsadüf edir. Son günlər hava şəraiti əlverişli keçir ki, bu da yığım prosesinə müsbət təsir göstərir. "Nar bağının sahəsi 265 hektardır. Hədəfimiz 3-4 min ton məhsul yığmaqdır. Hazırda hər hektardan 25 ton olmaqla, nar yığılır. Dərilən məhsullar yeşiklərə yığılaraq, çeşidləmə və saxlama anbarlarına göndərilir, oradan da xarici bazara ixrac olunur. Bağda yığım mövsümündə 350-450 işçi çalışır. Narlar yerli Azərbaycan sortu olan “Minaşirin” sortudur. Becərilmədə intensiv üsullar tətbiq edilir. Ötən illərə nisbətən bu il məhsuldarlıq da boldur, hər ağacdan 25-30 kiloqram məhsul yığılır", - deyə aqronom bildirir.
Onun sözlərinə görə, “Minaşirin” narının ağacı yüksək məhsuldarlığa malikdir. Meyxoş dadlı, irigiləlidir, sərin yerdə uzun müddət saxlamaq olur. Alıcılar da bu amillərə üstünlük verirlər.
Digər aqronom Təbriz Xəlilov bizi görüb yaxınlaşır. O da məhsuldarlıqdan razılıqla danışır. Qeyd edir ki, məhsul kiçik, orta və iri olmaqla çeşidlənir. Kiçik ölçülü narlar 250-300 qram, orta ölçülü 400-500, iri ölçülü narlar isə 700-750 qram olur. Çeşidlənən mallar sifarişlərə uyğun olaraq həm daxili, həm də xarici bazarlara göndərilir.
Sonra saxlama anbarına cavabdeh olan Arzu Quliyeva ilə söhbət edirik. Məlum olur ki, məhsullar saxlanma anbarında çeşidlərinə görə müxtəlif temperaturda saxlanılır: “Burada məhsullar hər çeşidə görə uyğun və fərqli dərəcədə kameralarda saxlanılır. Saxlama anbarı 10 otaqdan ibarətdir. Hər otaqda 150-200 ton məhsul olmaqla, 1500-2000 ton nar saxlamaq mümkündür. Məhsullar tələbata uyğun olaraq 1 və 4 ay müddətində anbarda qalır".
Qeyd edək ki, aqroparkda təkcə nar bağı deyil, həm də badam, şaftalı ərik və digər meyvə bağları salınıb. Burada bağçılıqla yanaşı, mövsümi əkinlər də yer alır. Aqroparkın fəaliyyəti həm də rayonda iş yerlərinin açılmasına şərait yaradıb.
Bölmənin digər xəbərləri
