“II Birlik Yarmarkası” Xeyriyyə Rəsm Sərgisinin açılışı olub VİDEO
Bakı, 1 iyun, AZƏRTAC
Bakıda 1 İyun - Uşaqların Beynəlxalq Müdafiəsi Günü münasibətilə “II Birlik Yarmarkası” Xeyriyyə Rəsm Sərgisinin açılış mərasimi keçirilib.
AZƏRTAC xəbər verir ki, Azərbaycan-Türkiyə İş Adamları Birliyi (ATİB), “Leykemiya ilə Mübarizə” İctimai Birliyi, “Asterias” Təlim və İnkişaf Mərkəzinin birgə təşkilatçılığı ilə keçirilən tədbir Dövlət Himninin səsləndirilməsi ilə başlayıb.
Müxtəlif ümumi təhsil müəssisələrinin şagirdləri tərəfindən ərsəyə gətirilmiş 145 əl işinin nümayiş olunduğu sərginin keçirilməsində məqsəd leykemiya xəstəliyi ilə mübarizə aparan kiçik fidanlara dəstək olmaqdır.
Qeyd olunub ki, bu təşəbbüs uşaqların yalnız yaradıcı potensialının dəstəklənməsi deyil, həm də cəmiyyətdə empatiya və sosial məsuliyyət duyğusunun təşviqi baxımından xüsusi əhəmiyyət daşıyır. Bildirilib ki, on iki mövzu üzrə çəkilən rəsm əsərlərinin müəlliflərinə əvvəlcədən təlimlər keçirilib.
“Asterias” Təlim və İnkişaf Mərkəzinin təsisçisi və təlimçisi Nərgiz Çalbay bildirib ki, xeyriyyə yarmarkasında sərgilənən rəsmlərin sahibləri istedadlarının fərqindədirlər. O qeyd edib ki, nümayiş olunan rəsmlər yalnız yaradıcı bir uşağın əl işinin təzahürü deyil, saf qəlblərin, yardımsevərliyin və birlik ruhunun göstəricisidir: “Hər rəsmin arxasında bir uşağın arzusu, gələcək üçün qurduğu planlar var. Bu sərgi yalnız maliyyə ilə bağlı deyil, birliyin, sevginin, ümidin paylaşılmasının rəmzidir”.
Daha sonra ötən il keçirilən sərginin hesabatını təqdim edən N.Çalbay deyib ki, leykemiya xəstəliyi olan uşaqlar üçün təşkil edilən hər bir tədbir xəstə uşaqlara maddi deyil, mənəvi dəstək vermək baxımından önəmlidir.
ATİB-in İdarə Heyətinin sədri Mürsəl Rüstəmov layihəni dəstəkləməkdən məmnun olduqlarını dilə gətirib.
Milli Məclisin Ailə, qadın və uşaq məsələləri komitəsinin sədri Hicran Hüseynova qeyd edib ki, Azərbaycanda bu günə qədər uşaqlarla bağlı bir çox qanunlarda dəyişikliklər edilib. Ölkəmizdə keçirilən xeyriyyə aksiyalarının Heydər Əliyev Fondunun və həmin Fondun prezidenti Mehriban Əliyevanın adı ilə bağlı olduğunu diqqətə çatdıran komitə sədri deyib: “Dövlət tərəfindən görülən iş vacibdir, ancaq cəmiyyət özü də xeyriyyə işlərinə hazır olmalıdır. Bir ana kimi ehtiyacı olan ailələrlə tanış oluram. Bu insanlar anlamalıdırlar ki, tək deyillər. Bu inam onlara daha çox güc verə bilər. İnsana psixoloji cəhətdən dəstək xəstəlikdən sağalmada daha çox rol oynaya bilər”.
Xalq rəssamı Arif Hüseynov çıxışında bu cür sərgilərin əhatə dairəsinin genişləndirilməsinin vacibliyini vurğulayıb.
Tədbirə onlayn qoşulan Ceymstaun Fondunun İdarə Heyətinin üzvü, Amerika Birləşmiş Ştatlarının Azərbaycandakı sabiq səfiri, beynəlxalq ekspert Metyu Brayza leykemiya xəstələrinə Heydər Əliyev Fondunun dəstəyini vurğulayıb. Bu cür uşaqların sağalması üçün Azərbaycan dövlətinin atdığı addımları alqışladığını söyləyib. Qeyd edib ki, Azərbaycanda bu sahəyə diqqət göstərilir. Yeni-yeni onkoloji mərkəzlərin açılmasına diqqət çəkən ekspert sərgi-yarmarkanın təşkilatçılarına, leykemiya xəstəsi uşaqların valideynlərinə dəstəyini ifadə edib.
Milli Məclisin İctimai birliklər və dini qurumlar komitəsinin sədri, deputat Fazil Mustafa leykemiyadan əziyyət çəkən ailələrin uşaqlarına dəstəyin əhəmiyyətinə toxunub. O deyib ki, sərgi-yarmarka xeyriyyə işlərinə yönəlik fəaliyyətin canlandırılması baxımından vacibdir.
Sosial Xidmətlər Agentliyinin İdarə Heyətinin sədr müavini Pərviz Səfərov leykemiya kimi ağır xəstəliklə mübarizə aparan uşaqlara dəstək olmağın vacib olduğunu vurğulayıb. “Uşaqların inkişafına yönələn hər bir təşəbbüs gələcəyimizə qoyulan ən dəyərli sərmayədir”, - deyə o diqqətə çatdırıb.
Tədbirdə çıxış edən digər natiqlər qeyd ediblər ki, bu cür tədbirlərin keçirilməsi, leykemiya ilə bağlı məlumatlandırmanın artırılması xəstələrin rifahının yüksəldilməsinə dəstək ola bilər.
Daha sonra rəsm əsərləri sərgi stendində və xeyriyyə auksionunda satışa çıxarılıb.
Qeyd edək ki, artıq ikinci ildir keçirilən sərgi-yarmarkada əldə olunan vəsait leykemiya ilə mübarizə aparan uşaqların müalicəsinə və onların rifahının yaxşılaşdırılmasına yönləndiriləcək.
Bölmənin digər xəbərləri
