“4Sİ Akademiyası”na ilkin mərhələdə 6654 nəfər qeydiyyatdan keçib
Bakı, 13 sentyabr, AZƏRTAC
23 avqust - 7 sentyabr tarixlərində "4Sİ Akademiyası"na ilkin mərhələdə 6654 nəfər qeydiyyatdan keçib.
AZƏRTAC xəbər verir ki, bu barədə Dördüncü Sənaye İnqilabının Təhlili və Koordinasiya Mərkəzinin icraçı direktorunun vəzifələrini icra edən Fariz Cəfərov deyib.
Qeyd edilib ki, Dünya İqtisadi Forumunun 2023-cü ildə işıq üzü görmüş “Future of Jobs” hesabatına əsasən, növbəti 5 il ərzində iş mühitində bacarıqların 44 faizi transformasiyaya məruz qalacaq və ən çox tələb olunanlar sırasında analitik bacarıqlar, yaradıcı düşüncə, texnoloji savadlılıq yer alacaq. Təkcə 2027-ci ilə qədər bütün biznes tapşırıqlarının 42 faizi, informasiya və məlumatların emalı üzrə işlərin isə 65 faizi avtomatlaşdırılacaq.
Eyni zamanda, hesabatda qeyd olunur ki, hər 10 işçidən 6-sı əlavə bacarıqlara ehtiyac duyacaq, lakin bir çoxunun ehtiyac duyduğu resurslara təəssüf ki çıxışı olmayacaq. Bu isə o deməkdir ki, hazırda yaşadığımız Sənaye İnqilabı bütün dünya ölkələri üçün yeni çağırışlar yaradır.
Azərbaycan 2030-cu il üçün ölkənin sosial-iqtisadi inkişafına dair beş Milli Prioritet reallaşdırılmağı hədəfləyir ki, bunlardan da biri rəqabətli insan kapitalını formalaşdırmaq və müasir innovasiyalar məkanı yaratmaqdır. Bu məqsəd, insanların yüksək keyfiyyətli təhsil almaq imkanlarını genişləndirməyi, kadr hazırlığının əmək bazarının tələblərinə uyğunlaşdırılmasını və peşə hazırlığı sisteminin inkişaf etdirilməsi tədbirləri çərçivəsində beynəlxalq sertifikatlara uyğun mütəxəssislər hazırlanılmasını hədəfləyir.
"4Sİ Akademiyası" layihəsi də ölkə çərçivəsində bu istiqamətdə icra edilən layihələrdən biridir. 100 milyondan çox insanın təhsil aldığı, 7000-dən çox kursların tədris olunduğu “Coursera” onlayn təhsil platformasının 2023-cü il hesabatında qeyd olunur ki, bu platformadan əldə edilən sertifikatlar sayəsində istifadəçilərin 77 faizi (inkişaf etməkdə olan ölkələrdə 91 faizi) yeni iş əldə etmiş, karyerasında yüksəliş qazanmış və ya müvafiq bilik bacarıqlara yiyələnmişdir. 100 ölkəyə dair statistik məlumatı əhatə edən bu hesabatda ölkəmiz 44-cü mövqedə qərarlaşıb. Hesabatda qeyd olunur ki, azərbaycanlıların 91 faizi biznes, 32 faizi texnologiya, 45 faizi isə data elmi sahəsində kurslara müraciət edib.
“4Sİ Akademiyası”na qoşularaq iştirakçılar DeepLearning.AI, Google, IBM, Amazon Web Services (AWS), Meta və digər bu kimi böyük texnoloji korporasiyalar, Kaliforniya, Toronto, Virciniya, London, Yale, Dyuk, Sidney Universitetləri kimi dünyanın aparıcı təhsil müəssisələri tərəfindən təqdim edilən kurslarda iştirak edə, sertifikatlar əldə edə bilər. Proqram dövründə tədris dili ingilis dilində olmaqla 4Sİ texnologiyaları, o cümlədən Süni İntellekt, Maşın Öyrənməsi, Böyük Verilənlər (Big Data), Data Analitika, Blokçeyn və bulud texnologiyaları, proqramlaşdırma dilləri, eləcə də liderlik, kommunikasiya kimi bacarıqlar da daxil olmaqla ümumilikdə 89 ixtisaslaşdırılmış alt kateqoriyanı əhatə edən 800-ə yaxın kursdan yararlanmaq mümkün olacaqdır", - deyə Fariz Cəfərov əlavə edib.
Bölmənin digər xəbərləri
