Şəhid anası: Ən böyük əsərim oğlum Emil oldu
Bakı, 28 sentyabr, AZƏRTAC
Nərimanov rayonunda Novruzov qardaşları adına 36 nömrəli tam orta məktəbin Azərbaycan dili və ədəbiyyatı müəllimi Şəmidə Əliyeva ömrünün 40 ildən çoxunu müəllimliyə, minlərlə şagirdin Vətənə və xalqa layiqli övlad kimi yetişməsinə həsr edib. Uzun illər şagirdlərinə Ana Vətəni sevməyi, tarixini bilməyi, xalqına və torpağına bağlı olmağı aşılayan Şəmidə müəllimin həyatının ən böyük hekayəsi isə öz oğlu - Dövlət Sərhəd Xidmətinin mayoru, uçuş rəhbəri Emil Əliyevin həyat və xidmət yolu olub. Emil Əliyev 1986-cı il fevralın 25-də Naxçıvan şəhərində ziyalı ailəsində anadan olub. 1992-ci ildə Naxçıvan şəhəri 12 nömrəli tam orta məktəbdə təhsil almağa başlayıb, 1996-cı ildən Bakı şəhərində Novruzov qardaşları adına 36 nömrəli tam orta məktəbdə təhsilini davam etdirib. 2003-cü ildə Bakı Dövlət Rabitə və Nəqliyyat Kollecində Gömrükxana işi ixtisası üzrə təhsil alıb.
Şəmidə Əliyeva AZƏRTAC-a açıqlamasında oğlu Emilin həyat yolundan danışarkən deyib ki, onun yetişməsində ailədə gördüyü tərbiyənin, xüsusilə də Vətənə bağlılığın mühüm rolu olub. Şəhid anasının sözlərinə görə, ailədə üç övladdan ortancılı Emil olub. Onun üçün ailənin dəyərləri, doğma torpağa bağlılıq və Azərbaycan tarixini bilmək həmişə xüsusi əhəmiyyət daşıyıb.
“Ömrümün 40 ildən çoxunu müəllimliyə həsr etmişəm. Naxçıvanda və Bakıda pedaqoji fəaliyyət göstərmişəm. Minlərlə şagirdim olub. Onlara yalnız Azərbaycan dili və ədəbiyyatını deyil, Vətən sevgisini, xalqımıza, tariximizə bağlılığı da öyrətməyə çalışmışam. Həmişə istəyirdim ki, şagirdlərim Vətəninə layiqli övlad olsunlar. Amma həyatımın ən böyük əsəri, ən böyük fəxrim öz oğlum Emil oldu. Mən müəllim kimi neçə-neçə şagird yetişdirmişəmsə, ana kimi də Emilə Vətən sevgisini, insanlıq və məsuliyyət hissini aşılamağa çalışmışam. O da böyüdükcə öz yolu ilə getdi, hərb sahəsini seçdi. Emil 2004-cü ildə Dövlət Sərhəd Xidmətinin Sahil Mühafizəsində matros kimi xidmətə başladı. Bir il sonra yüksək nəticə göstərərək Heydər Əliyev adına Akademiyaya qəbul oldu. Akademiyanı bitirdikdən sonra sərhəd dəstəsində zabit kimi xidmət etdi. Daha sonra aviasiya sahəsinə keçdi. Milli Aviasiya Akademiyasında mühəndis-pilot ixtisası üzrə hazırlıq kursunu bitirdi və pilot kimi fəaliyyət göstərdi. Xüsusi tapşırıqları yerinə yetirdi, qarşısına qoyulan vəzifələrin öhdəsindən həmişə layiqincə gəlməyə çalışdı. 2014-cü ildən uçuş rəhbəri kimi xidmət etməyə başladı. Rəhbərlik onun bilik və bacarıqlarını, nizam-intizamını və peşəkarlığını nəzərə alaraq ona böyük etimad göstərmişdi. Emil də bu etimadı doğrultdu. Xidmət etdiyi bütün illərdə öz vəzifəsinə şərəf və ləyaqətlə yanaşdı. 44 günlük Vətən müharibəsində də iştirak etdi. Müharibə zamanı uçuş rəhbəri kimi üzərinə düşən vəzifələri yerinə yetirdi. Şəxsi igidliyi və şücaətinə görə “Hərbi xidmətlərə görə” və “Kəlbəcərin azad olunmasına görə” medalları ilə təltif edildi. Xidməti dövründə müxtəlif medallara layiq görüldü. Amma 2021-ci il noyabrın 30-u mənim üçün həyatımın ən ağır günü oldu. Səngəçaldan qalxan helikopterin Xızı rayonunda yerləşən Qaraheybət aviasiya poliqonuna enişi zamanı qəzaya uğradığını və içərisində oğlumun da olduğunu eşitdim. O gün 13 nəfər ekipaj üzvü ilə birlikdə oğlum Emil də şəhid oldu. Bir ana üçün övladını itirmək sözlə ifadə olunmayacaq qədər ağırdır. Amma mən həmişə onunla fəxr etmişəm. Çünki Emil ömrünü Vətənə xidmətə həsr etdi. Mənim üçün o, sadəcə mayor, pilot, uçuş rəhbəri deyildi. O, mənim balam, həyatımın ən böyük əsəri idi. Bu gün də məktəbə gedirəm, şagirdlərimə dərs deyirəm. Bəlkə də məni ayaqda saxlayan elə məktəbdir. İllər boyu uşaqlara Vətən sevgisindən danışmışam. Bu gün həmin sözlərin mənim öz həyatımda nə qədər böyük məna daşıdığını daha yaxşı anlayıram.
Emil şəhidliyindən sonra da müxtəlif təltiflərə layiq görüldü. 3-cü dərəcəli “Vətənə xidmətə görə” ordeni və “Vətən uğrunda” medalı ilə təltif olunması mənim üçün qürurdur, eyni zamanda, onun xidmətlərinin dövlət tərəfindən qiymətləndirilməsinin göstəricisidir. Bir ana kimi oğlumun yoxluğuna heç vaxt öyrəşə bilmərəm. Amma onunla fəxr edirəm. Emil həyatda ikən də öz xidməti ilə Vətəninə layiqli övlad idi, şəhidliyi ilə də Azərbaycanın əbədi fəxrinə çevrildi”- deyə Şəmidə xanım fikrini yekunlaşdırıb.
Müxbir - Nərmin Muradzadə
Bölmənin digər xəbərləri
