İ.M. Seçenov adına Birinci Moskva Dövlət Tibb Universitetinin Bakı filialının kollektivi 20 Yanvar faciəsi qurbanların xatirəsini yad edib VİDEO
Bakı, 19 yanvar, AZƏRTAC
Azərbaycanda baş verən Qanlı Yanvar faciəsindən 26 il ötür. Bu müddət ərzində şəhid məzarları zamanın qan yaddaşına köçür, xalqımızın and yerinə çevrilərək ehtiramla yad olunur.
AZƏRTAC xəbər verir ki, respublikamızın hər yerində olduğu kimi, yanvarın 19-da İ.M.Seçenov adına Birinci Moskva Dövlət Tibb Universitetinin Bakı filialında 20 Yanvar faciəsinin 26-cı ildönümünə həsr olunmuş anım mərasimi keçirilib.
Əvvəlcə Birinci Moskva Dövlət Tibb Universitetinin Bakı filialının tələbə və müəllimləri Şəhidlər xiyabanını ziyarət edərək Azərbaycanın müstəqilliyi və ərazi bütövlüyü uğrunda mübarizədə canlarından keçmiş Vətənin qəhrəman oğul və qızlarının xatirəsini ehtiramla yad edib, məzarları üzərinə güllər düzüblər.
Ali təhsil müəssisəsinin akt zalında davam etdirilən tədbirdə torpaqlarımızın bütövlüyü uğrunda canlarından keçən igid Vətən övladlarının ruhu bir dəqiqəlik sükutla yad edilib.
Sonra İ.M.Seçenov adına Birinci Moskva Dövlət Tibb Universitetinin Bakı filialının rektoru, professor Əziz Əliyev 20 Yanvar faciəsinin dəhşətlərindən söhbət açaraq həmin gün Azərbaycan xalqının cəsarətli övladlarının göstərdiyi şücaətlərdən danışıb. O, ötən əsrin 90-cı ilində ölkəmizin müstəqilliyi, azadlığı uğrunda küçələrə çıxmış soydaşlarımıza qarşı insanlığa sığmayan vəhşiliklərin törədildiyini, əliyalın insanlara ağır silahlardan atəş açıldığını, hətta qocalara, qadınlara, uşaqlara belə rəhm edilmədiyini xatırladıb. Qeyd olunub ki, o vaxt Mərkəzi televiziya təxribat xarakterli məlumatlar yayır, baş vermiş faciənin miqyasını kiçiltməyə çalışırdı. Azərbaycanla əlaqə yaratmaq mümkün deyildi. Ölkə daxilində də müəyyən qüvvələr düzgün informasiyanın dünya ictimaiyyətinə çatdırılmasına mane olurdular. Həmin günlərdə azadlıq mücadiləsinə qalxmış xalqın iradəsini qırıb böyük imperiyanı saxlamaq istəyirdilər. Amma xalqın iradəsi, mərdliyi sayəsində onlar bu planlarını reallaşdıra bilmədilər. Hətta qadınlarımız öz vətənlərini qorumaq üçün təpədən-dırnağa qədər silahlanmış ordunun qarşısına əliyalın çıxmışdılar. Odur ki, 20 Yanvar bizim tariximizə faciə ilə yanaşı, həm də əsl igidlik, qəhrəmanlıq səhifəsi kimi daxil olub. Xalqımız öz qanı bahasına azadlığına qovuşub.
Rektor Əziz Əliyev deyib ki, həmin dövrdə sovet mediası 20 Yanvarla bağlı yanlış məlumatlar yayır, baş verənləri gizlədir, çox az sayda itkinin olduğu haqda məlumatlar verirdi. Yalnız o dövrdə siyasi rəhbərlikdən kənarlaşdırılmış xalqımızın dahi oğlu, ümummilli lider Heydər Əliyevin həyatını təhlükə qarşısında qoyaraq Azərbaycanın Moskvadakı nümayəndəliyinə gələrək kəskin bəyanat verməsi və əsl günahkarların cəzalandırılmasını tələb etməsi nəticəsində həqiqəti əks etdirən informasiyalar bütün dünyaya çatdırıldı. Həmin mətbuat konfransında dünyanın nüfuzlu KİV-nə bu faciənin səbəbləri haqqında düzgün məlumatlar verildi.
Rektor Heydər Əliyevin yenidən ölkə rəhbərliyinə qayıdışından sonra bu istiqamətdə gördüyü işlərdən, onun təşəbbüsü ilə ilk dəfə bu hadisəyə hüquqi-siyasi qiymət verildiyindən danışıb, şəhidlərin xatirəsinin əbədiləşdirilməsi, onların ailə üzvlərinə kömək üçün ulu öndərin imzaladığı sənədlərin bu insanların xatirəsinə böyük ehtiram olduğunu bildirib. Vurğulanıb ki, ulu öndərin siyasi kursunu uğurla davam etdirən Prezident İlham Əliyev Vətənimizin ərazi bütövlüyü uğrunda canlarından keçənlərin əziz xatirəsinin daim yad edilməsi, onların ailələrinin sosial rifah halının yüksəldilməsi, mənzil-məişət şəraitinin yaxşılaşdırılması istiqamətində mühüm əhəmiyyətli tədbirlərin həyata keçirilməsinə göstəriş verib, çox zəruri fərmanlar imzalayıb.
Sonra tədbirdə çıxış edən tələbələr ölümləri ilə qorxu hissini öldürən 20 Yanvar şəhidlərinin heç zaman unudulmayacağını, doğma Azərbaycanımızda və eləcə də dünyanın müxtəlif ölkələrində fəaliyyət göstərən soydaşlarımızın qəlbində əbədi yaşayacaqlarını söyləyiblər. Qeyd olunub ki, imperiya bu qəddarlığı ilə Azərbaycanın haqq səsini boğa bilmədi və şəhidlərimizin azadlıq, müstəqillik arzusu reallaşdı. Ulu öndər Heydər Əliyevin zəngin idarəçilik qabiliyyəti, siyasi uzaqgörənliyi sayəsində müstəqilliyimiz daimi oldu.
Toplantını yekunlaşdıran professor Əziz Əliyev Azərbaycanın hər bir övladının bu hadisə haqqında saatlarla danışa biləcəyini qeyd edərək bir daha xatırladıb ki, həmin gün xalqımız qəhrəman övladlarını itirdi. Lakin bu böyük itkilərə baxmayaraq bizim əsas təsəllimiz qazandığımız müstəqil, azad Azərbaycan oldu. Şəhidlərimizin qanı bahasına və xalqımızın iradəsi, ulu öndərimizin istər xarici, istər daxili siyasəti nəticəsində ölkəmiz bu gün dünyanın inkişaf etmiş ölkələri arasında öz layiqli yerini tutur.
Tədbirdə həmçinin 20 Yanvar hadisələri zamanı həkimlərimizin fədakarlığından bəhs edən sənədli film də nümayiş olunub.
Bölmənin digər xəbərləri
