MƏDƏNİYYƏT


BAKIDA DAHİ BƏSTƏKAR QARA QARAYEVİN EV-MUZEYİ AÇILACAQDIR

Bakı, 16 iyul (AZƏRTAC). Azərbaycanda fəaliyyət göstərən elm, siyasət, mədəniyyət və incəsənət xadimlərinin ev muzeylərinin sırasına yaxın vaxtlarda daha biri də əlavə olunacaqdır. Bakıda Azərbaycanın dahi bəstəkarı Qara Qarayevin ev-muzeyi açılacaqdır.

Mədəniyyət və Turizm Nazirliyindən AZƏRTAC-a bildirmişlər ki, artıq dahi bəstəkara aid müxtəlif fondlarda saxlanılan materialların siyahısı tutulmuşdur. Yaxın günlərdə əldə olunan materialların toplandığı kataloq işıq üzü görəcəkdir.

Ümumilikdə böyük bəstəkarın ev-muzeyinə təqdim olunacaq eksponatların sayı 1000-dən çoxdur. Onların arasında sənətkarın əlyazmaları, məktubları, şəxsi kitabxanasından üzərində qeydləri olan kitabları, səs yazıları vardır. Muzeydə, həmçinin Qara Qarayevin baletlərinə çəkilmiş eskizlər sərgilənəcəkdir.

Bundan əlavə, muzeyin yaradılması ilə bağlı ölkəmizdən kənarda da bəstəkarın irsinin araşdırılması istiqamətində iş aparılmış və xeyli material toplanmışdır. Artıq Moskvadakı Dövlət Ədəbiyyat və İncəsənət Arxivindən Qara Qarayevə aid sənədlər, bəzi əlyazmalar, sənətkarın çəkdiyi fotoşəkillər ölkəmizə gətirilmişdir. Qara Qarayevin ev-muzeyində Sankt-Peterburq teatrından əldə olunan tamaşaların afişaları, musiqilərin not əlyazmalarının surətləri, səs yazıları, fotoşəkillər də öz yerini tutacaqdır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.