Türkmənistan Prezidentinin ölkəmizə səfəri münasibətlərimizin strateji mahiyyətini bir daha təsdiqləyir RƏY
Bakı, 23 iyun, AZƏRTAC
Türkmənistan Prezidentinin Azərbaycana dövlət səfəri Azərbaycan-Türkmənistan münasibətlərinin yüksələn xətlə inkişaf etdiyini və iki qardaş ölkə arasında strateji tərəfdaşlığın daha da möhkəmləndiyini nümayiş etdirir. Azərbaycan və Türkmənistan həm Türk dünyasının ayrılmaz hissəsi, həm də Xəzər dənizinin hər iki sahilində yerləşən yaxın qonşu və geostrateji əhəmiyyətə malik dövlətlərdir. İki ölkə arasında formalaşan dostluq və tərəfdaşlıq münasibətləri geosiyasi baxımdan hər iki dövlətin mövqeyini gücləndirən mühüm amillərdən biridir.
Bunu AZƏRTAC-a açıqlamasında Milli Məclisin deputatı Tural Gəncəliyev bildirib.
Onun sözlərinə görə, hazırda Azərbaycanın və Türkmənistanın artan rolu Orta Dəhlizin inkişafı, regionda nəqliyyat-kommunikasiya xətlərinin genişlənməsi, Xəzər dənizində daşımaların intensivləşməsi və Xəzərin resurslarından səmərəli istifadə istiqamətində özünü daha aydın göstərir. Bu baxımdan Azərbaycan-Türkmənistan əməkdaşlığı Xəzər hövzəsində formalaşan yeni geosiyasi reallıqlar fonunda xüsusi əhəmiyyət daşıyır. Azərbaycan böyük Türk dünyasında birləşdirici nüvə ölkə kimi çıxış edir. Türkmənistan isə Türk dünyasının mühüm və ayrılmaz komponentlərindən biridir. Bu baxımdan iki ölkə arasındakı münasibətlər Türk Dövlətləri Təşkilatının güclənməsi və yeni regional əməkdaşlıq platformalarının inkişafı kontekstində də xüsusi əhəmiyyət kəsb edir. Türkmənistan Azərbaycan üçün Mərkəzi Asiyaya və böyük Avrasiya məkanına açılan strateji qapıdır. Azərbaycan isə Türkmənistan üçün Cənubi Qafqaza, Xəzərin qərb sahillərinə və Avropaya çıxışı təmin edən etibarlı tərəfdaşdır. Türkmənistan dünyanın ən zəngin təbii resurslara malik ölkələrindən biridir. Neft və qaz ehtiyatları ilə yanaşı, nadir metallar və digər faydalı qazıntılar baxımından da ölkənin böyük potensialı mövcuddur. Dünyanın dördüncü ən böyük təbii qaz ehtiyatlarına malik olan Türkmənistan hazırda Çinə ildə təxminən 30 milyard kubmetr qaz ixrac edir və bu həcmin gələcəkdə 60 milyard kubmetrə çatdırılması planlaşdırılır. Bu isə Türkmənistanın geoiqtisadi və geosiyasi baxımdan mühüm güc mərkəzlərindən birinə çevrilmək potensialını göstərir.Türkmənistan Prezidentinin Azərbaycana dövlət səfəri, dövlət başçılarının Qarabağa və Şuşaya birgə səfərləri iki ölkə arasında münasibətlərin xüsusi xarakter daşıdığını nümayiş etdirir. Türk dövlətləri arasında Türkmənistanla əlaqələrin inkişafı da Azərbaycan üçün xüsusi önəm daşıyır.
“Azərbaycan-Türkmənistan əməkdaşlığının perspektivli istiqamətlərindən biri də Trans-Xəzər qaz kəməri layihəsidir. Xəzər dənizinin dibi ilə çəkilməsi nəzərdə tutulan bu kəmər Türkmənistan qazının Avropa bazarlarına çatdırılması baxımından strateji əhəmiyyət daşıyır. Bu istiqamətdə Azərbaycanın üstünlüyü artıq formalaşmış enerji infrastrukturuna malik olmasıdır. Trans-Xəzər qaz kəməri vasitəsilə Azərbaycana çatdırılacaq Türkmənistan qazı Cənub Qaz Dəhlizi, TANAP və TAP layihələri ilə təhlükəsiz şəkildə Avropa bazarına nəql edilə bilər. Bu, eyni zamanda, Türkmənistanın enerji ixrac marşrutlarını şaxələndirməsinə də mühüm töhfə verəcək. Son illər Türkmənistanın xarici siyasətində də mühüm dəyişikliklər müşahidə olunur. Əvvəllər daha çox strateji neytrallıq siyasəti yürüdən bu ölkə hazırda regionda gedən geosiyasi proseslərdə daha fəal iştirak etməyə çalışır. Bu baxımdan Azərbaycan kimi strateji baxışa malik dövlətlə münasibətlərin inkişaf etdirilməsi tamamilə məntiqidir. Azərbaycan ərazi və əhali baxımından böyük dövlət olmasa da, həyata keçirdiyi uğurlu xarici siyasət sayəsində qlobal miqyasda nüfuz qazanan ölkələrdən biridir. Türkmənistan da Azərbaycanın bu təcrübəsini diqqətlə izləyir və müxtəlif sahələrdə ondan faydalanmaqda maraqlıdır”, - deyə deputat bildirib.
T.Gəncəliyev vurğulayıb ki, Azərbaycan-Türkmənistan münasibətləri yalnız Xəzər hövzəsi və Mərkəzi Asiya ilə məhdudlaşmır. Bu əməkdaşlıq Çindən Avropaya qədər uzanan geniş coğrafiyada enerji təhlükəsizliyi, nəqliyyat-kommunikasiya marşrutları, logistika, geoiqtisadi və geosiyasi əməkdaşlıq baxımından mühüm əhəmiyyət daşıyır. İki ölkə arasında münasibətlərin inkişafı qarşıdakı dövrdə yeni perspektivlər açacaq və strateji tərəfdaşlığı daha da möhkəmləndirəcək.
Müxbir – Səbinə Əlizadə
Bölmənin digər xəbərləri
