Faiq Əhməd: İncəsənətin əsasında hər zaman fikir dayanır
Bakı, 23 iyun, AZƏRTAC
Xalçalar bizim keçmişimiz, tariximiz və mədəniyyətimizdir. Bu, çox böyük bir gücdür. Rəssam olaraq bu irsi işləmək, onu yaşatmaq və gələcək nəsillərə ötürmək böyük məsuliyyət tələb edir. İnsanın fikirləri çox zaman görünmür, xüsusilə də rəssamın düşüncələri. Biz adətən zahirdə olanlara – sözlərə, hərəkətlərə və görülən işlərə diqqət yetiririk. Halbuki fikir çox incə məqamdır və insan özü də onu hər zaman dərk edə bilmir. Mən bu layihədə məhz həmin fikrin yaranma anını göstərməyə çalışmışam.
AZƏRTAC xəbər verir ki, bu sözləri jurnalistlərə açıqlamasında Əməkdar rəssam Faiq Əhməd deyib.
Rəssam qeyd edib ki, incəsənət yaradıcılıq prosesinin dərin daxili axtarışlar tələb etdiyi mürəkkəb bir sahədir.
“İncəsənət asan iş deyil. İnsan öz daxilinə enməli, orada olanları üzə çıxarmalı, özünü tanımalı, sonra yenidən özünə qayıdaraq eyni sualları verməli və cavabları da daxilində tapmalıdır. Bu, kifayət qədər yorucu və çətin prosesdir. Bəzən xırda məqamlar diqqətdən kənarda qala bilər, lakin bütöv mənzərəyə baxdıqda görürsən ki, yaradıcılıq insanın həm mənəvi, həm də emosional gücünü tələb edir”, – deyə o bildirib.
Faiq Əhmədin sözlərinə görə, incəsənətin əsasında hər zaman fikir dayanır: “Hər hansı bir əsər yaranmazdan əvvəl ilk növbədə fikir formalaşmalıdır. Forma isə real dünyada insanlarla müəyyən əlaqə qurmalı, onlarda düşüncə və hiss oyatmalıdır. Mənim üçün əsas olan da məhz budur”.
Bölmənin digər xəbərləri
