REGİONLAR
Bu il Şəkidə 790 hektarda yeni fındıq bağları salınıb
Şəki, 19 dekabr, Mustafa Dadaşov, AZƏRTAC
Dövlətimizin başçısının kənd təsərrüfatının ixrac potensialı yüksək sahələrinin, o cümlədən qərzəkli meyvəçiliyin inkişaf etdirilməsi ilə bağlı verdiyi tapşırıq və göstərişlərin icrasını təmin etmək məqsədilə son illər Şəki rayonunda da davamlı iş aparılır.
Şəki Şəhər Statistika İdarəsindən AZƏRTAC-ın bölgə müxbirinə bildirilib ki, cari ildə rayonda 790 hektarda yeni fındıq bağları salınaraq, mövcud bağların sahəsi 4681 hektara çatdırılıb. Builki mövsümdə fındıq bağlarından 4010 ton məhsul tədarük olunub. Hər hektar fındıq bağından orta hesabla 10,3 sentner məhsul götürülüb.
Eyni zamanda, bu il rayonda 57,5 hektarda yeni qoz bağları salınıb. Hazırda rayonda mövcud qoz bağlarının sahəsi 636 hektardır. Bu il bağlardan 1151 ton məhsul yığılıb.