Masallıda “Şuşa qartalı” kompozisiyası nümayiş olunub
Masallı, 10 dekabr, Bağır Əliyev, AZƏRTAC
Masallı Rayon Mədəniyyət Mərkəzində 44 günlük Vətən müharibəsində igidliklə döyüşərək şəhidlik zirvəsinə ucalmış Azərbaycan Xüsusi Təyinatlı Qüvvələrinin polkovnik-leytenantı, Vətən Müharibəsi Qəhrəmanı Ramiz Sübhan oğlu Cəfərovun xatirəsinə yazıçı-publisist Nurəddin Ədiloğlunun ithaf etdiyi "Şuşa qartalı" adlı ədəbi-bədii kompozisiya nümayiş olunub.
Tədbirdə rayon rəhbərliyi, hüquq-mühafizə orqanlarının əməkdaşları, şəhid ailələri, qazilər, Bakı və Sumqayıt şəhərlərindən gələn qonaqlar, ictimaiyyətin nümayəndələri iştirak ediblər.
Ədəbi-bədii kompozisiyada Masallı Xalq Teatrının yaradıcı qrupu və Masallı Dövlət Regional Kollecinin müəllim və tələbələri yer alıblar.
AZƏRTAC-ın bölgə müxbiri xəbər verir ki, tamaşadan əvvəl Azərbaycanın suverenliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib.
Şəhid polkovnik-leytenant Ramiz Cəfərovun həyat yoldaşı Sitarə Cəfərova ömür-gün yoldaşı ilə bağlı xatirələrindən, onun Vətənə xidmətindən danışıb.
Tamaşadan sonra Masallı Rayon İcra Hakimiyyətinin başçısı Şahin Məmmədov, Masallı Regional Mədəniyyət İdarəsinin rəisi Bəxtiyar Qılıncov və digər rayon rəsmiləri şəhid valideynləri, onların övladları ilə görüşüblər. Şəhidin ailə üzvləri onlara göstərilən diqqət və qayğıya görə dövlətimizin başçısına minnətdarlıqlarını bildiriblər.
Qeyd edək ki, şəhid Ramiz Cəfərov 1974-cü il dekabrın 10-da anadan olub. O, 1989-1992-ci illərdə Cəmşid Naxçıvanski adına Hərbi Liseydə, 1992-1996-cı illərdə V.F.Marqelov adına "Suvorov" ordenli Ryazan Qvardiya Ali Hava-Desant Komandanlığı Məktəbində ali hərbi təhsil alıb. Alman, ingilis və rus dillərini mükəmməl bilən
Ramiz Cəfərov 2004-cü il martın 1-dən martın 20-dək ABŞ-da, NATO-nun "Əməliyyat heyəti zabitləri" kursunda iştirak edib.
Aprel döyüşlərində iştirak edən igid döyüşçü Vətən müharibəsində Xüsusi Təyinatlı Qüvvələrin sıralarında tabeliyində olan hərbi qulluqçularla Cəbrayıl rayonu və Şuşa rayonu istiqamətlərində gedən döyüşlərdə qəhrəmanlıqlar göstərib. Ramiz Cəfərov noyabrın 6-da Şuşa döyüşləri zamanı şəhid olub. O, İkinci Şəhidlər xiyabanında dəfn edilib. Cəsur döyüşçü ailəli idi, dörd qızı və bir oğlu yadigar qalıb.
Azərbaycan Respublikası Prezidentinin Sərəncamına əsasən Ramiz Cəfərov ölümündən sonra “Cəbrayılın azad olunmasına görə”, “Şuşanın azad olunmasına görə”, “Füzulinin azad olunmasına görə” və “Xocavəndin azad olunmasına görə” medalları ilə təltif edilib.
Bölmənin digər xəbərləri
