Pekin beynəlxalq uçuşları bərpa edir
Pekin, 3 sentyabr, AZƏRTAC
Çin Mülki Aviasiya Administrasiyası bir neçə aylıq fasilədən sonra paytaxt Pekinin hava limanlarının beynəlxalq uçuşları qəbul etməsinə icazə verib.
AZƏRTAC xəbər verir ki, ilkin mərhələdə Pakistan, Kamboca, Tailand, Danimarka, Avstriya, Kanada, İsveç və Yunanıstandan Pekinə uçuşlar bərpa ediləcək. Kambocanın paytaxtı Pnompendən gələn təyyarə martdan sonra Pekinin hava limanına xaricdən ilk uçuş olacaq. Hazırda gündəlik maksimum min sərnişinin xaricdən Pekinə daxil olmasına icazə verilib. Pekinə yalnız Çin vətəndaşları və uçuş məntəqəsinin olduğu ölkənin vətəndaşları uça bilər. Başqa sözlə, əcnəbilərə tranzit reyslərlə Pekinə uçuşuna icazə verilmir.
Qaydalara əsasən, Çin paytaxtına xaricdən gələn bütün sərnişinlərdən koronavirus testinin neqativ nəticəsini təqdim etmək tələb olunur. Bundan başqa, sərnişinlər öz hesabına 14 gün karantində qalmalıdırlar.
Qeyd edək ki, Çin Mülki Aviasiya Administrasiyası COVID-19 pandemiyası ilə əlaqədar martda paytaxta xaricdən uçuşları dayandırmışdı. Pekin üçün nəzərdə tutulan bütün təyyarələr digər şəhərlərin hava limanlarında qəbul edilirdi.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
