Pirallahı rayonunda 2018-ci ilin birinci rübünün yekunları müzakirə olunub

Bakı, 17 aprel, AZƏRTAC

Aprelin 17-də Pirallahı Rayon İcra Hakimiyyəti başçısının 2018-ci ilin birinci rübünün sosial-iqtisadi inkişafının yekunlarına dair hesabat yığıncağı keçirilib. Hesabat yığıncağında rayonun idarə, müəssisə, təşkilatlarının təmsilçiləri və rayon ictimaiyyəti nümayəndələri iştirak ediblər.

İcra hakimiyyətindən AZƏRTAC-a bildiriblər ki, hesabat yığıncağında çıxış edən Pirallahı Rayon İcra Hakimiyyətinin başçısı Vasif İmanov ölkəmizin sürətlə və uğurla inkişaf etdiyini, Azərbaycan xalqının sabitlik və təhlükəsizlik şəraitində yaşadığını qeyd edib. O, Pirallahı rayonunun da yola saldığımız il ərzində həm sosial-iqtisadi, həm də ictimai-siyasi sahədə yeni uğurlu nəticələrə imza atdığını diqqətə çatdırıb. Son beş ildə paytaxtımız Bakı şəhərinin rayonları sırasında öz layiqli yerini tutmuş Pirallahı rayonunun artıq tərəqqi və inkişaf yolu ilə inamla irəlilədiyini söyləyən V.İmanov rayonda həyata keçirilən layihələr barədə qısa məlumat verib.

Vasif İmanov bildirib ki, 2017-ci il avqustun 2-də Azərbaycan Respublikasının Prezidenti İlham Əliyev Pirallahıda tikinti-quruculuq işlərinin davam etdirilməsi ilə bağlı Sərəncam imzalayıb. Sərəncama əsasən “Azərbaycan Respublikasının 2017-ci il dövlət büdcəsi haqqında” Azərbaycan Respublikası Qanununun tətbiqi barədə” Prezidentin 2016-cı il 27 dekabr tarixli Fərmanında nəzərdə tutulmuş vəsaitdən Bakı şəhəri Pirallahı Rayon İcra Hakimiyyətinə 9,5 milyon manat, o cümlədən Rayon İcra Hakimiyyətinin inzibati binasının tikintisinin davam etdirilməsi üçün 4,5 milyon manat, qəzalı vəziyyətdə olan yaşayış binalarının sakinlərinin mənzil-məişət şəraitinin yaxşılaşdırılması məqsədilə 29 yeni beşmərtəbəli çoxmənzilli binanın tikintisi üçün ilkin olaraq 5 milyon manat ayrılıb. Pirallahı qəsəbəsi S.Vurğun küçəsində yeni yaşayış binalarının tikintisi üçün ayrılmış 6,5 hektar ərazidə şaquli planlaşdırma, həmçinin ərazidən keçən kommunikasiya xətlərinin köçürülməsi işləri aparılıb. Hazırda tikinti-quraşdırma işləri davam etdirilir.

Vasif İmanov qeyd edib ki, rayonda salınacaq “Yüksək Texnologiyalar Parkı”nda layihələndirmə işləri aparılır. Pirallahı qəsəbəsində inzibati mərkəz üçün ayrılmış ərazidə Pirallahı RİH-in inzibati binasının inşası, Heydər Əliyev Mərkəzinin və Yeni Azərbaycan Partiyasının Rayon Təşkilatı üçün tikilən yeni inzibati binalarda tikinti işləri davam etdirilir. S.Vurğun küçəsində Gənclər Əyləncə Mərkəzi üçün ayrılmış ərazi inşaat hasarına alınıb. Rayon üzrə məktəbəqədər tərbiyə müəssisələrinə olan tələbatı ödəmək məqsədilə Heydər Əliyev Fondunun təşəbbüsü və dəstəyi ilə tikilən 2 ədəd 140 və 100 yerlik körpələr evi-uşaq bağçasının inşaat işləri davam etdirilir. Artıq 140 yerlik körpələr evi-uşaq bağçasında işlər tamamlanmaq üzrədir. Heydər Əliyev Mərkəzi park kompleksində şaquli planlaşdırma işləri aparılır. Parkda fəvvarənin betonlanması və giriş hissədə sütunların inşası, layihəyə uyğun olaraq inşa olunan kafenin və idman meydançasının metal konstruksiyasının quraşdırılması, piyada yollarının tikintisi işləri aparılır.

Sənaye sahəsində görülən işlərdən söz açan V.İmanov vurğulayıb ki, dövlətimizin başçısının 2016-cı il 14 sentyabr tarixli Sərəncamına əsasən yerli əczaçılıq sənayesinin təşkili məqsədilə yaradılmış Pirallahı Sənaye Parkında “Hayat Pharm” və “Caspian Pharmed” dərman preparatları, eləcə də şpris istehsalı zavodlarının yaradılması istiqamətində işlər davam etdirilir. Həmçinin “Nərəkənd” balıqyetişdirmə kompleksində qapalı və açıq tipli fermalarının tikinti-quraşdırma işləri aparılır.

Ətraf mühitin qorunması, ekoloji tədbirlər və turizmin inkişafından danışan V.İmanov qeyd edib ki, rüb ərzində 2000-ə qədər zeytun ağacı əkilib, yaşıllıqların nəzarətdə saxlanılması, torpaq sahələrinin şumlanması işləri aparılıb. Turizmin inkişaf perspektivlərinə toxunan icra başçısı qeyd edib ki, Pirallahı, Gürgən və Çilovda inşa ediləcək istirahət mərkəzləri və komplekslər, otel və mehmanxanalar, Tarix-Diyarşunaslıq Muzeyi, Gənclər Əyləncə Mərkəzi ilə yanaşı, yeni tikilmiş körpünün altındakı 120 metrlik keçidin açılması ilə su idman növlərinin, o cümlədən yelkənli qayıqsürmə və avarçəkmənin inkişafı, yeni müasir çimərliyin, skuter gəzintilərinin, ada ətrafında gəmi kruizlərinin təşkili üçün əlverişli imkanlar yaranıb.

Hesabat ətrafında çıxış edən “28 May” NQÇİ-nin rəisi Zaur Bağırov, 51 saylı hərbiləşdirilmiş yanğın hissəsinin rəisi Ceyhun Vəliyev, Pirallahı rayon Məşğulluq Mərkəzinin direktoru Məhərrəm Məhərrəmov və başqaları əldə olunmuş uğurlardan, mövcud problemlər və onların aradan qaldırılması yollarından danışıblar.

Sonda sosial-iqtisadi və mədəni inkişafına öz töhfələrini vermiş, ictimai həyatında fərqlənmiş, keçirilən tədbirlərdə fəal iştirak etmiş bir qrup rayon sakini Pirallahı Rayon İcra Hakimiyyəti tərəfindən mükafatlandırılıb.