Avropa Gənclər Parlamentinin Azərbaycan nümayəndəliyinin Gəncə şəhərində 10-cu səfər sessiyası

“Financial Chain Corporation”ın İdarəedici Tərəfdaşı Zaur Qədirov Avropa Gənclər Parlamentinin Azərbaycan nümayəndəliyinin Gəncə şəhərində keçirilən 10-cu sessiyasında iştirak edib. “Gələcəyimizi birlikdə qururuq” devizi altında keçirilən sessiyada FCHAIN-in İdarəedici Tərəfdaşı “Dayanıqlı inkişafda regional gənclərin rolu” mövzusunda çıxış edib. Gənclərin cəmiyyətdə əhəmiyyətini vurğulayan Z.Qədirov onların davamlı inkişafın təşviqində, eləcə də qlobal problemlərin həllinə innovasiya, enerji və yeni perspektivlər gətirməkdə rolunu qeyd edib.

“İlk növbədə gənclərin cəmiyyətdə əhəmiyyətini qeyd etmək istərdim. Gənclik tikinti, istehsal və tərəqqi üçün işçi qüvvəsi təmin etdiyinə görə ən dinamik seqment, böyümə və inkişafın mühərriki, hər bir xalqın təməl sütunu və dayağıdır. Buna görə də, gənclərin cəmiyyətdə və sahibkarlıq fəaliyyətində iştirakının gücləndirilməsi və dəstəklənməsi onların böyüməsi və inkişafı üçün çox vacibdir. Gənclər cəmiyyətin tərəqqisində, çiçəklənməsində, güclü dövlət və böyük xalq quruculuğunda mühüm rol oynayır”, - deyə Zaur Qədirov vurğulayıb.

FCHAIN-in İdarəedici Tərəfdaşı qeyd edib ki, gənclər həyatın bütün sahələrində fəal iştirak edir, iqtisadi potensialın artırılması, milli-mənəvi dəyərlərə və ümumbəşəri ideallara əsaslanan vətəndaş cəmiyyətinin gücləndirilməsi üçün əlindən gələni əsirgəmir, zəngin mədəni irsin qorunması və təbliği istiqamətində mühüm addımlar atırlar. FCHAIN-in gənclərin müxtəlif sahələrdə, xüsusən də idmanda inkişafına verdiyi dəstəkdən danışan Z.Qədirov gənc və istedadlı gimnast Züleyxa Şabanova ilə rəsmi sponsorluq müqaviləsini xüsusi vurğulayıb. Müqaviləyə əsasən, rəsmi sponsor olaraq “Financial Chain Corporation” gənc gimnastı idman formaları, avadanlıqlar, aksesuarlar, suvenirlər, lazım gəldikdə isə maliyyə vəsaiti ilə təmin edir. Eyni zamanda, gimnastın müxtəlif ölkələrdə keçirilən turnirlərdə və idman tədbirlərində iştirak edə bilməsi üçün nəqliyyat və yaşayış xərclərini, tibbi sığortanı da öz üzərinə götürür.

“Gənclər və idman sahəsində uğurlu əməkdaşlığa görə Azərbaycan Respublikasının Gənclər və İdman Nazirliyinə və Azərbaycan Atletika Federasiyasına dərin təşəkkürümüzü bildiririk. Gənclərin idman sahəsində inkişafı da prioritet məsələdir. FCHAIN-in sponsorlardan biri kimi iştirak etdiyi əsas tədbirlər arasında Bakı-Xankəndi ultramarafonunu, “Yaşıl dünya naminə həmrəylik ili” çərçivəsində Gəncə şəhərində keçirilən “Birlikdə Qaçaq” marafonunu xüsusilə qeyd edə bilərik. “EYP Azərbaycan”ın bugünkü sessiyası da böyük əhəmiyyət kəsb edir, çünki regionlarda daim inkişaf edən və qlobal problemlərin həllinə töhfə vermək istəyən savadlı və cəsarətli gənclər var. “Financial Chain Corporation” olaraq biz gənclərin hərtərəfli inkişafı və cəmiyyətdə fəal iştirakını təmin etmək üçün həyata keçirilən bütün tədbirləri hər zaman dəstəkləyirik. FCHAIN-in şüarı “Daha yaxşı gələcək”dir və biz gələcək nəslin xoşbəxt, sağlam və uğurlu gələcəyinə töhfə vermək imkanımızdan məmnunuq”, - deyə Zaur Qədirov vurğulayıb.