® Uğurlu insan olmasan, uğurlu biznesmen olmaq şansın yoxdur - Cəlal Kəngərli
- Fotoqraf, rejissor, dəb dizayneri və iş adamı Cəlal Kəngərli. Sizi bu peşələrdən hansı daha çox məmnun edir?
- Ritorik sualınıza ritorik cavab verim. Cəlal Kəngərli - dövrün nəbzini tutmağa çalışan revanşist reformator, incəsənəti sevən, iqtisadçı kimi düşünən bir iş adamıdır. Konkret cavablandırmalı olsam, bildiyiniz kimi “Kengerli company” bir neçə istiqamətdə fəaliyyət göstərir. Hər bir istiqamətdə müvafiq peşəkar mütəxəssislərin çalışmağına baxmayaraq, onların administrasiyası, idarəetmə sistemi, mühasibatı ən əsası isə nüfuzu və məsuliyyəti mənimlə bağlıdır. Yəni mənim tərəfimdən idarə olunur. Bu da istəsəm də, istəməsəm də mənə iş adamı statusu verir
- On il öncə özünüzü görmək istədiyiniz yerdəsiniz?
- Əldə etdiklərim kifayət qədər çoxdur, lakin hədəflərim də var. Arzu etdiyim istiqamətdə inkişaf edən xətlə irəliləyirəm.
- Uğurlu biznesmen, yoxsa uğurlu insan?
- Sözsüz ki, uğurlu insan. Düşünürəm ki, insan uğurlu olmasa uğurlu biznesmen də olma şansı yoxdur. Biznesdə də, uğur əldə edə bilməz. Çünki biznes ilk növbədə insanlarla ünsiyyətdir, insanlarla əlaqədir. İnsani xüsusiyyətlər yaxşı olmadıqdan sonra bu əsas iki faktorun öhdəsindən gəlmək mümkün deyil. Və onun da öhdəsindən yaxşı gəlmədikdən sonra sözsüz ki, yaxşı biznesmen, yaxşı idarəçi olmaq da mümkün olmaz
- Bildiyimiz kimi siz videoqraf kimi tanınmısınız daha sonra özünüzə məxsus geyim markası yaratdınız. Son olaraq isə memarlıq və dizayn şirkəti ilə adınızdan söz etdirdiniz. Geyim markanız dizayn şirkəti qədər iddialı deyil. Bu nə ilə bağlıdır. Bir neçə işi eyni zamanda yürütmək çətin deyil ki?
- Geyim xəttimizi aşdığımız illərdə çox iddialı idik, bu illər ərzində bütün ulduzları geyindirdik, Parisdə, Moskvada “fashion week”lərdə uğurla iştirak edib, Kengerli adından bəhs etdirə bildik. Lakin pandemiyadan sonra vəziyyət dəyişdi. Pandemiyanın zərbə vurduğu sektorlardan biri də geyim sektoru oldu. Pandemiyadan sonra dəb dəyişdi, insanlar daha sadə paltarlara üstünlük verdi. Üstəgəl online sifariş sistemləri, özəl dizaynıma ciddi ziyan vurdu. Puma sindromu bilirsiniz nədir? Quru heyvanlarının ən sürətlisi olan puma gündəlik qida istehlakı üçün çox ağıllı şəkildə ovlamalıdır. Onlar enerjisini israf etməkdən çəkinir, kiçik ov üçün enerji sərf etmir. Çünki puma kiçik ov üçün çox enerji sərf edərsə, sonrakı gün yeni ov tapmaq üçün çox səy göstərə bilməz. O ya böyük şikarın arxasınca qaçmalı, enerjisini daha böyük və daha qaneedici məqsədlər üçün istifadə etməlidir, ya da imtina edib yeni planlar qurmalıdır. Məhz buna görə də pumaların böyük əksəriyyəti bu ayrımı edir və ovlarını məharətlə tutur. Onlar vaxtını və enerjisini itirmədən planlı şəkildə hərəkət edir, hesablamalarını yaxşı aparır.
- Xüsusilə son dövrlərdə ali təhsili ilə gördüyü iş üst-üstə düşməyən insanların sayı artıb. Bu barədə nə düşünürsünüz, gördüyümüz işdə ruhumuz yoxsa biliklərimiz ön plana çıxarsa uğur qazanarıq?
- Sözünüzdə həqiqət var. Sadəcə onu da nəzərə almalıyıq ki, indi təhsil almaq, istənilən istiqamətdə maariflənmək qat-qat asan və əlçatandır. MBA, xaricdə təhsil, online təhsil və s . Odur ki, ruhuna uyğundursa iş biliklərini artırıb məhz sənə maraqlı olan, ruhunu oxşayan, sevdiyin işlə məşğul olmalısan.
- Dar məqamlarda motivasiya mənbəyiniz?
- Motivasiya mənbəyim inamım və bu günə qədər zəhmətlə əldə etdiklərimdir. Mütaliəni sevirəm, oxuduğum və oxumaq istədiyim kitabların siyahısı var. Onlar iki sütunda yer alır. Və sütunlardan biri sürətlə kiçilir. Meditasiya ilə məşğul oluram. Sizə də məsləhət görürəm.
- Kangarli and Co Memarlıq və Dizayn şirkətinin Kəngərli dəst-xəti hansı məqamlarda gizlidir. Sizi bu sahədə fərqli edən nədir?
- Mənim məşğul olduğum bütün işlər yaradıcı incəsənətə aiddir. İstər rejissor, istər geyim-libas xətti. İnteryer də həmçinin. Biz zövqümüzü interyerdə də əks etdiririk. İnteryerə sadəcə bir ev kimi, yaşayış yeri kimi deyil, bir yaşam tərzi kimi baxırıq və buna da yaradıcı yanaşırıq. Düşünürük ki, çoxlarından da fərqimiz sırf elə budur ki, yaratdığımız hər bir interyer və yaxuddakı exteryer həm individualdır, həm yaradıcıdır, eyni zamanda, rahat və funksionaldır.
- Uğur ağılın məhsuludur, yoxsa şansın ?
- Heç şübhə yox ki, qalıcı və davamlı uğur ağıl işidir! Çünki şansı dəyərləndirmək üçün yenə də ağıl lazımdır!
- İş dünyasında özünü sübut etmək istəyən gənclərə tövsiyəniz?
- Hədəfləri dəqiq və düzgün müəyyənləşdirmək, sabit fikirli olmaq, iradəli, inamlı və ədalətli olmaq.
- Yaxın gələcəkdə reputasiyanızda hansı yeniliklər gözlənilir?
- Konkret hədəflərim var. Hədəfə çatmaq üçün sağlam təməl olmalıdır. Düşünürəm ki, mən onu yaratmışam. Zaman və tələb yeni planlar üzrə addımlarımı atmağa kömək edir. Amma hazırda çarxın daha sabit dönməyi üçün şirkətimizin sistemi üzərində çalışır, özümü və komandamı inkişaf etdirirəm.
Bölmənin digər xəbərləri
