İordaniya XİN: ABŞ hərbçilərinin ölkədəki mövcudluğu müdafiə əməkdaşlığı sazişi ilə tənzimlənir
Qahirə, 4 sentyabr, AZƏRTAC
Amerika Birləşmiş Ştatları hərbçilərinin İordaniyadakı mövcudluğu ABŞ ilə imzalanmış müdafiə əməkdaşlığı sazişi çərçivəsində tənzimlənir.
AZƏRTAC Qətərin QNA xəbər agentliyinə istinadla bildirir ki, bunu İordaniyanın Baş nazirinin müavini, xarici işlər naziri Əymən əs-Səfədi Vyanada Avstriyanın Avropa və beynəlxalq məsələlər üzrə federal naziri Beate Maynl-Rayzingerlə birgə keçirdiyi mətbuat konfransında deyib.
İordaniyanın xarici işlər naziri bildirib ki, ABŞ hərbçiləri ölkədəki hərbi bazalarda yerləşir və bir sıra sahələrdə İordaniya Silahlı Qüvvələri ilə əməkdaşlıq edirlər.
Onun sözlərinə görə, müdafiə sahəsində əməkdaşlıq çərçivəsində İordaniyada digər tərəfdaş ölkələrin də hərbi qüvvələri fəaliyyət göstərir. Bu baxımdan, İordaniya ilə Avstriya arasında əməkdaşlıq da qeyd olunub. Bildirilib ki, bir neçə ay əvvəl iki ölkə arasında Avstriya hərbçilərinin İordaniyada fəaliyyətini tənzimləyən saziş imzalanıb. Sazişə əsasən, Avstriya hərbçiləri İordaniya tərəfi ilə hərbi təlimlər və təcrübə mübadiləsi sahəsində əməkdaşlıq edirlər.
Nazir vurğulayıb ki, İordaniyanın tərəfdaş ölkələrlə uzun illərdir davam edən əməkdaşlığı terrorizmlə mübarizə səylərində mühüm rol oynayıb.
Əymən əs-Səfədi bildirib ki, İordaniya təhlükəsizliyini, sabitliyini, suverenliyini və vətəndaşlarının təhlükəsizliyini qorumaq məqsədilə bütün zəruri tədbirləri görmək üçün suveren və qanuni hüququndan istifadə etməyə davam edəcək.
Bölmənin digər xəbərləri
