"Qızıl Şah 2024” çempionatında iştirak edəcək komanda üzvlərinin seçimi aparılır
Bakı, 7 mart, AZƏRTAC
"Qızıl Şah 2024” IV Respublika Çempionatında iştirak edəcək tələbələri müəyyənləşdirmək məqsədilə növbəti daxili yarış Mədəniyyət və Sənətkarlıq üzrə Bakı Dövlət Peşə Təhsil Mərkəzində keçirilib.
Peşə Təhsili üzrə Dövlət Agentliyindən AZƏRTAC-a bildirilib ki, yarışda iştirak edən tələbələr 45 dəqiqə müddətində bir növ ana yemək, ona uyğun qarnir və sous hazırlayıblar. Çempionata “Bulvar Marriot” hotelin aşpazı Emil Qurbanov mentorluq edib.
Tələbələr münsiflər heyəti tərəfindən iş prosesi zamanı gigiyena qaydaları və ardıcıllığa düzgün riayət edilməsi, yeməyin dadı və resepturaya uyğun olması, yeməyin düzgün şəkildə servis və dekor edilməsi nominasiyalarına uyğun olaraq qiymətləndirilib. Faiq Həsənov və Rauf Salamov I yerə, Rasim Abbasov və Fatimə Ağababayeva II yerə, Qəmərxanım Hüseynova və Səfurə İsrafilova III yerə layiq görülərək fəxri fərman, digər iştirakçılar isə təşəkkürnamə ilə təltif olunublar.
Qeyd edək ki, Azərbaycan Kulinariya Mütəxəssisləri Assosiasiyası tərəfindən keçirilən “Qızıl Şah 2024” 4-cü Respublika Çempionatında böyüklər və gənclər kateqoriyaları üzrə komandalar arasında yarışlar, həmçinin “ət”, “quşəti”, “dəniz məhsulları”, “art sinfi” və “restoran deserti” kateqoriyaları üzrə fərdi yarışlar keçiriləcək. Həmçinin tarixdə ilk dəfə olaraq beynəlxalq “Qızıl Şah Kuboku” 8 ölkənin milli komandası arasında oynanılacaq. Sözügedən çempionat “Worldchefs” təşkilatının himayəsi altında keçirilir.
Xatırladaq ki, daxili yarışların ümumilikdə 8 peşə təhsil müəssisəsində keçirilməsi planlaşdırılır.
Bölmənin digər xəbərləri
