ABİTURİYENTLƏR SINAQ İMTAHANLARI VERİRLƏR
Nəzarətçi kimi imtahanlarda Bakı şəhərinin orta ümumtəhsil məktəblərinin müəllimləri iştirak edirlər. Sınaq imtahanları onlar üçün, həm də qəbul imtahanlarının texnologiyasına yiyələnmək baxımından çox faydalıdır. Sınaq imtahanlarına TQDK-nın mütəxəssisləri rəhbərlik edirlər ki, bu da onlara nəzarətçi müəllimin imtahanı aparmaq bacarığını yoxlamaq vərdişləri aşılayır. Sınaq imtahanlarında iştirak edən abituriyentlər isə öz biliklərini yoxlamaq, ümumi hazırlıq səviyyələri haqqında məlumat almaq imkanına malikdirlər.
İmtahanların yoxlama funksiyası hər hansı bir tədris materialının qavranılmasında güclü və zəif tərəfləri aşkar etməyə yönəlmişdir. Bu isə abituriyentləri yenidən dərslik və dərs vəsaitlərinə qayıtmağa, müvafiq mövzuları daha dərindən öyrənməyə məcbur edir.
Qəbul imtahanı prosesinin psixoloji təhlili göstərir ki, imtahanda yüksək nəticə abituriyentin özünü idarə etməyindən, fikrini cəmləməyindən və vaxtdan səmərəli istifadə etməyindən çox asılıdır. Test tapşırıqlarının cavablarının yoxlanması üçün vaxtın qalması da çox vacibdir. Sınaq imtahanları abituriyentlərə imtahan şəraitinə psixoloji cəhətdən uyğunlaşmaqda, “Cavab kartı”nı səhvsiz doldurmaqda, ayrılmış vaxtdan səmərəli istifadə etməkdə kömək göstərir.
Sınaq imtahanları iştirakçılarının “Cavab kartı”nın yoxlanması və toplanmış balların hesablanması kompüter texnologiyalarının köməyi ilə, optik və printer formalarından istifadə olunmaqla həyata keçirilir. Bu isə ali məktəblərə qəbul imtahanlarının metod və texnologiyalarına tamamilə uyğundur. Abituriyentlərə sınaq imtahanlarının nəticələri haqqında kompüterdən çıxarılmış arayış təqdim olunur. Arayışda abituriyentin hər fənn üzrə doğru və yanlış cavablarının sayı, ayrı-ayrı fənlərdən topladığı nisbi balı, həmçinin altqruplar üzrə topladığı ümumi balı göstərilir. Sınaq imtahanlarının cavabları TQDK-nın İnternet saytında da yerləşdiriləcəkdir: tqdk.qov.az.
Bölmənin digər xəbərləri
