“ABŞ-da insan hüquqlarının vəziyyəti. Neoimperializm yeni mərhələdə” mövzusunda dinləmələr keçirilib
Bakı, 10 iyun, AZƏRTAC
İyunun 10-da “Bakı-2015: Birinci Avropa Oyunlarına Dəstək” Vətəndaş Cəmiyyəti Koalisiyası və “Azad Azərbaycan” Müstəqil Teleradio Kampaniyasının birgə təşkilatçılığı ilə “ABŞ-da insan hüquqlarının vəziyyəti. Neoimperializm yeni mərhələdə” mövzusunda dinləmələr keçirilib.
AZƏRTAC xəbər verir ki, tədbirdə KİV və QHT rəhbərləri, politoloqlar iştirak ediblər.
Koalisiyanın əlaqələndiricisi, Beynəlxalq Münasibətlərin Araşdırılması Mərkəzi İctimai Birliyinin sədri Rufiz Qonaqov bildirib ki, Avropa Oyunları yaxınlaşdıqca ölkəmizə qarşı antitəbliğat kampaniyası daha da güclənir. Azərbaycanın güclənməsi, əldə etdiyi uğurlar sözsüz ki, bəzi dairələri narahat edir. Tədbirdə bu narahatlığın yaranma səbəblərindən danışılacaq.
Bütöv Azərbaycan Xalq Cəbhəsi Partiyası sədrinin müavini, “Xalq cəbhəsi” qəzetinin baş redaktoru Elçin Mirzəbəyli “Müstəqil dövlətlərdə keçirilən beynəlxalq idman və mədəniyyət tədbirlərini siyasiləşdirmək cəhdləri və anti-Azərbaycan kampaniyası” mövzusunda çıxış edib. O deyib ki, dünyanın bir sıra regionlarında xalqlar və dövlətlər arasında münasibətlərin gərginləşdiyi, dini və milli zəmində kənardan stimullaşdırılan ziddiyyətlərin dərinləşdiyi zamanda idman və mədəniyyət tədbirlərinin ənənəvi diplomatiya, eləcə də ictimai diplomatiyanın ən təsirli elementi kimi ön plana çıxması təbii qəbul olunmalıdır. Məgər müstəqil siyasət yeritməyə üstünlük verən dövlətlərin, o cümlədən Azərbaycanın ərazisində təşkil olunan kütləvi idman və mədəniyyət tədbirləri sülhə, əmin-amanlığa, qarşılıqlı anlaşmaya xidmət etmirmi? Əlbəttə ki, edir.
Qeyd edilib ki, aqressiyanın səbəbini də məhz burada axtarmaq lazımdır. Ölkəmizə qarşı aparılan və vahid mərkəzdən idarə olunduğu artıq heç kimdə şübhə doğurmayan kampaniyanın əsasında hansı dairələrin, hansı maraqların dayandığını xüsusi işarə ilə göstərməyə ehtiyac yoxdur. Amerika Erməni Milli Komitəsinin icraçı direktoru Aram Hamparyanın Avropa Oyunlarının boykot edilməsi ilə bağlı açıq çağırışı fikirlərimizin tamamilə doğru olmasını bir daha sübuta yetirir. Dünyanı müharibə ilə idarə etməyə çalışan, milyonlarla insanın faciəsi üzərində öz iqtisadi və geosiyasi maraqlarını təmin etməyə çalışan güclər sözün əsl mənasında barışda, sülhdə maraqlı deyillər.
“ABŞ-da irqi və dini zəmində ayrı-seçkilik təzahürlərinin güclənməsi” mövzusunda çıxış edən Vətəndaşların Əmək Hüquqlarının Müdafiə Liqasının sədri, hüquq müdafiəçisi Sahib Məmmədov bildirib ki, birinci Avropa Oyunlarına qarşı kampaniyada ABŞ dairələri də fəal iştirak edirlər. Vurğulanıb ki, dini və etnik tolerantlığın yüksək səviyyədə olduğu Azərbaycanın irqi ayrı-seçkiliyin tüğyan etdiyi, multikulturalizmin dəstəklənmədiyi ABŞ tərəfindən müzakirəyə çıxarılması təəssüf doğurur. ABŞ-da ağdərili polislər qaradərililərin üzərinə silah çəkir və bunu heç nədən çəkinmədən edirlər. Onlar arxayındırlar ki, məhkəmələrdə olanların böyük əksəriyyəti ağdərilidir və heç vaxt ağdərililərin əleyhinə qərar qəbul etməyə imkan verməzlər.
Orta Asiya və Güney Qafqaz Söz Azadlığı Şəbəkəsinin sədri Azər Həsrət “Cəmiyyət üzərində total nəzarət sistemi: şəxsi həyata müdaxilə, ifadə və mətbuat azadlığının məhdudlaşdırılması” adlı məruzə ilə çıxış edib. A. Həsrət vurğulayıb ki, ABŞ hətta hamilə qadına ölüm hökmü kəsərək onu icra edən, 14 yaşlı gəncin ölümünə hökm verən dövlətdir. Sonra məlum oldu ki, həmin o gənc günahsız imiş. Yəni, insan hüquqlarından danışan dövlət budur. Bəzən deyirlər ki, orada hər şey idealdır. Biz olanları dedikdə isə onlar üstümüzə gəlir ki, yalandır. Biz heç nə demirik, olanları deyirik. Ötən il cəmi 8 gün ərzində polislərin jurnalistlərə qarşı zorakılığı olmuşdu. Bütövlükdə isə bu hadisə ilə bağlı heç bir təşkilat səsini çıxarmadı. Amma Azərbaycanda hansısa polis bir jurnalisti bölməyə çağırıb sula-cavab etdikdə, həmin an ABŞ Dövlət Departamenti bəyanat yayır.
Konstitusiya Araşdırmalar Fondunun prezidenti Əliməmməd Nuriyev “Leqal korrupsiya və ABŞ siyasi sisteminin əsas elementlərindən biri kimi” mövzusunda məruzə ilə çıxış edərək deyib ki, ABŞ-da seçkilərdə seçilən şəxs digərlərinə nisbətən daha çox vəsait xərcləyib. Bu da korrupsiyanın bir qolu deyilmi? Bu gün heç kimə sirr deyil ki, ABŞ-da lobbiçilik leqallaşıb. Onlar bir çox ölkələrdə də istəyirlər ki, bunu leqallaşdırsınlar.
“ABŞ-ın müstəqil siyasət yürüdən ölkələrə təzyiq vasitələri: insan hüquqları ilə manipulyasiyaya, rəngli inqilablar və onların fəsadları” mövzusunda məruzə ilə çıxış edən “Paradiqma” İctimai-Siyasi Tədqiqatlar İctimai Birliyinin sədri Elman Nəsirov vurğulayıb ki, ABŞ Azərbaycan üçün strateji tərəfdaş dövlətdir və Azərbaycan onunla əməkdaşlıqda maraqlıdır. Ancaq çox təəssüf ki, ABŞ Azərbaycana qarşı qərəzli addımlar atır. Elman Nəsirov əlavə edib ki, ABŞ Azərbaycan üçün strateji tərəfdaşdır, ancaq bu ölkə adekvat addımlar atmır. ABŞ başqa dövlətlərin işinə qarışır, özünün strateji tərəfdaşı olan Azərbaycanın da daxili işlərinə qarışmağa çalışır.
“İki sahil” qəzetinin baş redaktoru Vüqar Rəhimzadə deyib ki, ABŞ-da insanlığa qarşı atılan addımlar narahatlıq doğurur. Bu ölkədə yetkinlik yaşına çatmayan gəncin edam edilməsi vəziyyətin nə yerdə olduğunu göstərir. ABŞ-ın başqa ölkələrin daxili işlərinə qarışması tamamilə yolverilməzdir. Bu ölkədə qaradərili insanlara kifayət qədər təqib və təzyiqlər varsa, hansı demokratiyadan danışıla bilər?
Daha sonra koalisiyanın əlaqələndiricisi, “Bakı xəbər” qəzetinin baş redaktoru Aydın Quliyevin, Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun və digərlərinin mövzu ətrafında çıxışları dinlənilib. Qeyd edilib ki, əgər dünya bərabərhüquqlu prinsiplər əsasında qurulubsa, hər kəs başqasının seçdiyi yola hörmətlə yanaşmalıdır. Əks halda biz də məcbur oluruq ki, başqalarının daxili durumunu müzakirə edək. Əgər bu gün ABŞ-da insanın təhlükəsiz yaşamaq hüququna təminat yoxdursa, yaşamaq təhlükəlidirsə, o halda Konstitusiya və İnsan Hüquqları Bəyannaməsi ilə yaşananlar arasında çox böyük fərq var. İnsan hüquqlarına hörmət etməyən bir ölkənin başqa dövlətlərdə bunu bəhanə gətirərək daxili işlərə qarışması ikili standartdır.
Bölmənin digər xəbərləri
