ABŞ-DA NAMƏLUM ŞƏXS UNİVERSİTET ŞƏHƏRCİYİNDƏ ATƏŞ AÇMIŞDIR

18.09.2006 [15:16]
Çap et
A⁺ A^-

AZƏRTAC Frans Press Agentliyinə istinadla xəbər verir ki, sentyabrın 17-nə keçən gecə Amerikanın Pittsburq şəhərindəki universitetin “Duquesne” basketbol komandasının beş oyunçusu güllə yarası almışdır. Onlardan ikisi çox ağır vəziyyətdədir.

Hadisə Duquesne Universitetinin ərazisində, tələbələrin əyləncə gecəsindən sonra baş vermişdir. Yataqxananın yanından keçərkən iki basketbolçu, ehtimala görə, əyləncə gecəsində özünü ləyaqətsiz aparmış naməlum kişi ilə danışmışdır. Cavanlar onu sakitləşdirməyə çalışmış, lakin uğursuz cəhdlərdən sonra ondan üz çevirib getməyə başlamışlar. Bu zaman kişi tapança çıxarıb atəş açmışdır.

Yaxınlıqda olan və yüyürüb köməyə gələn daha bir neçə basketbolçu da güllə yarası almışdır. Müxtəlif məlumatlara görə, hadisə yerində 6-dan 12-dək atəş eşidilmişdir.

Universitetin prezidenti Çarlz Dogerti bildirmişdir ki, atəş açan və onu müşayiət edən bir qrup adam tələbə deyildir.