ABŞ KONQRESİ PAKİSTANA 689 MİLYON DOLLAR MƏBLƏĞİNDƏ YARDIM AYRILMASINI BƏYƏNMİŞDİR

14.11.2005 [14:57]
Çap et
A⁺ A^-

AZƏRTAC İTAR-TASS agentliyinə istinadla xəbər verir ki, ABŞ Konqresi 2006-cı ildə Pakistana 689 milyon dollar məbləğində maliyyə yardımı ayrılmasını bəyənmişdir. Bu məbləğin 300 milyon dolları müdafiə xərclərinin və iqtisadi ehtiyacların ödənilməsinə, 40 milyon dolları hüquq mühafizə orqanlarının möhkəmləndirilməsinə, narkotiklər istehsalı və nəqli ilə mübarizəyə yönəldiləcəkdir. Sosial sahənin inkişafına 29 milyon dollar ayrılmışdır. Daha 20 milyon dollar uşaqlara və səhiyyəyə yardım proqramlarına sərf olunacaqdır.

Bu vəsait 2003-cü ilin iyun ayında Prezident Corc Buş tərəfindən elan edilmiş Pakistana 3 milyard dollar məbləğində beşillik yardım proqramı çərçivəsində verilir.

Nümayəndələr palatası Pakistana yardımın məbləğini əvvəlcə 80 milyon dollara endirmişdi, lakin sonra hökumətin rəyi ilə razılaşmış və Senat əvvəlki məbləği bərpa etmişdir.

Pakistan beynəlxalq terrorizmlə mübarizədə Vaşinqtonun əsas müttəfiqlərindən biri sayılır.