Aİ və ABŞ Ermənistanı silahladırmaqla Cənubi Qafqazda sülh prosesinə mane olur - ŞƏRH
Bakı, 2 avqust, AZƏRTAC
Avropa İttifaqı (Aİ) və ABŞ Cənubi Qafqazda mövqelərini möhkəmlədirmək, Rusiyanı isə Ermənistandan sıxışdıraraq çıxarmaq istiqamətində fəaliyyətləri rəsmi İrəvanla Bakı arasında gedən sülh danışıqlarına nəinki yardım göstərmir, hətta sülh prosesini ləngidir və yeni münaqişənin alovlanmasına xidmət edir. Avropa İttifaqı Şurasının Ermənistan silahlı qüvvələrinin maddi-texniki imkanlarını artırmaq məqsədilə İrəvana Avropa Sülh Fondu çərçivəsində 10 milyon avro məbləğində dəstək verməsi isə Aİ-nin və ABŞ-ın sülh prosesində maraqlı olmadığını göstərir.
Bu sözləri AZƏRTAC-a açıqlamasında hüquq müdafiəçisi Sahib Məmmədov söyləyib.
O bildirib ki, paralel olaraq Avropa İttifaqı Ermənistanı şirnikləndirmək üçün bir sıra digər tədbirlərə də başlayıb. Bunlardan biri də viza liberallaşması və vizasız gediş-gəlişlə bağlıdır. Bundan əvvəl belə bir razılaşma Gürcüstanla olub. Gürcüstanın son vaxtlar qəbul etdiyi bəzi qanunlar və gördüyü tədbirlərdən sonra bu statusun ləğv edilməsi ilə bağlı bu ölkənin hakimiyyətinə hədələr gəlməkdədir. İndi isə Ermənistan vətəndaşları üçün belə statusun verilməsi üçün dialoqa start verilib. Məqsəd aydındır. Onlar Gürcüstanda niyyətlərini tam yerinə yetirə bilmədikdən sonra Cənubi Qafqazda Ermənistanı özlərinin forpostu etmək istəyirlər. Ermənistan isə bundan əvvəl forpostu olduğu ölkəyə xəyanətə meyilli olsa da, hələlik tərəddüd etməkdədir. Əgər Avropa İttifaqı Ermənistan vətəndaşlarına vizasız gediş-gəliş statusu versə, o zaman Ermənistan əhalisinin Avropaya kütləvi köçü daha da asanlaşacaq. Lakin bu vizasız gediş-gəlişin Ermənistan vətəndaşlarına Avropada işləmək hüququnu verib-verməyəcəyi hələ müəyyən edilməyib. İstənilən halda, bu gedişlə Avropa İttifaqı həm də Ermənistan əhalisini həvəsləndirir və Paşinyan hakimiyyətinə loyal olmağa təşviq edir.
“Avropa İttifaqı və ABŞ ümid edir ki, bu yolla Ermənistanı Rusiyanın təsirindən tam çıxarmağa nail olacaqlar. Ermənistan isə Avropa İttifaqı və ABŞ-dan bəhrələnməklə paralel olaraq, Rusiya ilə iqtisadi münasibətləri saxlamaqla daha çox maddi və siyasi dividendlər əldə etməyi düşünür. Əldə etdiklərini isə hücum silahlarının alınmasına yönəldir. Beləliklə, Avropa İttifaqi və ABŞ Ermənistanı silahladırmaqla Cənubi Qafqazda sülh prosesinə mane olur. İkincisi isə ümid edir ki, bu yolla Ermənistanı Rusiyanın təsiri altından çıxara biləcək. Bu yanlış siyasət isə region ölkələrinin, o cümlədən Ermənistanın maraqlarına xidmət etmir. Təəssüf ki, Ermənistan növbəti dəfə alət rolunu oyanamaqdadır. Amma Ermənistan və onun havadarları bilməlidirlər ki, revanşa nail ola bilməyəcəklər. Əksinə, növbəti dəfə daha ağır vəziyyətə düşəcəklər”, - deyə hüquq müdafiəçisi qeyd edib.
Bölmənin digər xəbərləri
