ELM VƏ TƏHSİL
Akademik Həsən Abdullayevin xatirəsi anılıb
![](/files/galleryphoto/2023/2/1200x630/1692614187282737505_1200x630.jpg)
![](/files/galleryphoto/2023/2/1200x630/1692614187793158626_1200x630.jpg)
![](/files/galleryphoto/2023/2/1200x630/16926141884899519060_1200x630.jpg)
Bakı, 21 avqust, AZƏRTAC
Elm və Təhsil Nazirliyinin Fizika İnstitutunun bir qrup alimi akademik Həsən Abdullayevin 105 illiyi ilə əlaqədar onun məzarını ziyarət edib.
Bu barədə AZƏRTAC-a institutdan məlumat verilib.
Ziyarət zamanı çıxış edən AMEA-nın birinci vitse-prezidenti, Fizika İnstitutunun baş direktoru akademik Arif Həşimov görkəmli alim, akademik Həsən Abdullayevin
elmi fəaliyyəti, zəngin irsindən danışıb, onun Azərbaycan elminin inkişafında böyük xidmətlərinin olduğunu bildirib, gənclərə xüsusi diqqət və qayğı göstərdiyini qeyd edib.
Fizika üzrə fəlsəfə doktorları Kamil Qurbanov və Almaz Xəlilova akademik Həsən Abdullayevlə bağlı xatirələrini bölüşüblər.
Akademik Həsən Abdullayev 1918-ci ildə Culfa rayonunda anadan olub. O, 1941-ci ildə Azərbaycan Pedaqoji İnstitutunun fizika-riyaziyyat fakültəsini bitirib, 1948-ci ildə fizika üzrə fəlsəfə doktoru, 1954-cü ildə fizika üzrə elmlər doktoru elmi dərəcəsini alıb, ona 1957-ci ildə professor elmi adı verilib. Alim 1955-ci ildə Azərbaycan Elmlər Akademiyasının (EA) müxbir üzvü, 1967-ci ildə həqiqi üzvü, 1970-ci ildə SSRİ EA-nın müxbir üzvü seçilib.
Həsən Abdullayev Ordubad Pedaqoji Məktəbində müəllim (1941-1943), 1944-cü ildən Azərbaycan EA-nın Fizika İnstitutunda aspirant, elmi işçi, direktor müavini, 1957-ci ildən ömrünün axırınadək direktor olub. O, 1968-1970-ci illərdə Azərbaycan EA FRTE Bölməsinin akademik-katibi, Azərbaycan EA prezidenti (1970-1983) vəzifələrində çalışıb.
Alim Azərbaycanda müasir fizikanın, xüsusilə yarımkeçiricilər fizikası və texnikasının əsasını qoyub, inkişaf etdirib, yüksək səviyyəli fiziklər məktəbi yaradıb. H.Abdullayev 13 monoqrafiyanın, 500-dən artıq elmi məqalənin, 40-dan çox ixtiranın müəllifidir. Onun təşəbbüsü ilə 1956-cı ildə Azərbaycan Dövlət Universitetində (indiki Bakı Dövlət Universiteti) yarımkeçiricilər fizikası kafedrası yaradılıb. O, SSRİ EA Rəyasət Heyəti yanında Yarımkeçiricilər fizikası və kimyası Elmi Şurasının üzvü, respublika Fizika Problemləri Elmi Şurasının sədri, elm və texnika sahəsində Azərbaycan Respublikası Dövlət Mükafatları Komitəsinin sədri olub.
Həsən Abdullayev elm sahəsində qazandığı nailiyyətlərə görə yüksək mükafatlara və fəxri adlara layiq görülüb.