Akademik İsmayıl Hacıyevin yeni kitabı gənc oxuculara təqdim olunub
Naxçıvan, 15 dekabr, AZƏRTAC
AMEA Naxçıvan Bölməsində muxtar respublikanın fəal gənclərinin “Naxçıvan Muxtar Respublikasının sosial-iqtisadi və mədəni inkişafı” adlı monoqrafiyanın müəllifi, akademik İsmayıl Hacıyevlə görüşü olub.
Bölmədən AZƏRTAC-ın Naxçıvan bürosuna bildirilib ki, tədbirdə çıxış edən Naxçıvan Muxtar Respublikası Gənclər Fondunun icraçı direktoru Cəbi Quliyev ölkəmizdə həyata keçirilən gənclər siyasəti və onun uğurlu nəticələrindən bəhs edib. Bildirib ki, əsası ulu öndər Heydər Əliyev tərəfindən qoyulan gənclər siyasəti Prezident İlham Əliyev tərəfindən uğurla davam etdirilir. Naxçıvan Muxtar Respublikasında da gənclərlə iş yüksək səviyyədə qurulub, onların asudə vaxtının səmərəli təşkili üçün hər cür şərait yaradılıb.
Naxçıvan Bölməsinin sədri, akademik İsmayıl Hacıyev qazanılmış elmi nailiyyətləri muxtar respublika gənclərinin diqqətinə çatdırıb. Gənclərə elmin bütün sahələrində ehtiyac olduğunu vurğulayan akademik bildirib ki, AMEA Naxçıvan Bölməsinin fəaliyyətinin əsas qayəsi naxçıvanşünaslıq elminə xidmət etməkdir.
Müəllif monoqrafiya haqqında gənclərə ətraflı məlumat verərək bildirib ki, sözügedən nəşr Naxçıvan Muxtar Respublikasının yaradılmasının 95 illiyinə həsr olunub. Nəşrdəki fəsilləri və onların əhatə etdiyi mövzuları gənclərin diqqətinə çatdıran akademik qeyd edib ki, kitabı oxuyan hər kəs 1995- 2019-cu illərdə muxtar respublikada sosial-iqtisadi və mədəni sahədə baş verən dəyişikliklərin, dinamik və davamlı inkişafın, əldə edilmiş nailiyyətlərin şahidi olacaq. Monoqrafiyadan yararlanan hər bir fəal gənc öz gələcək fəaliyyətində məhz bu perspektivli inkişafı nümunə götürə bilər.
Muxtar respublikada ərazi, enerji və ərzaq təhlükəsizliyinin tam təmin olunduğunu, elm, təhsil, mədəniyyət, turizm və digər sahələrdəki irəliləyişləri diqqətə çatdıran akademik vurğulayıb ki, 25 il ərzində əldə edilmiş inkişaf məhz xalqın və dövlətin mənafeyinə yönəlmiş uğurlu siyasətin bəhrəsidir. Həmin uzaqgörənliyin nəticəsidir ki, Naxçıvan bu illər ərzində daim yüksələn inkişaf tempi ilə uğurla irəliləyir. Çıxışının sonunda akademik İsmayıl Hacıyev elmə, təhsilə, mədəniyyətə göstərdiyi diqqət və qayğıya görə Naxçıvan Muxtar Respublikası Ali Məclisinin Sədrinə minnətdarlığını bildirib.
Sonra fəal gənc Şövkət Kərimlinin monoqrafiya haqqında çıxışı dinlənilib və gəncləri maraqlandıran suallar cavablandırılıb.
Bölmənin digər xəbərləri
