Akrobatika üzrə Azərbaycan birinciliyi başa çatıb
Bakı, 15 noyabr, AZƏRTAC
Azərbaycan Gimnastika Federasiyasının mətbuat xidməti xəbər verir ki, Bakı Gimnastika Məktəbində akrobatika üzrə 21-ci Azərbaycanı birinciliyi başa çatıb. Azərbaycan Gimnastika Federasiyasının mətbuat xidmətindən AZƏRTAC-a bildiriblər ki, Bakı Gimnastika Məktəbini, Nizami Rayon İdman Məktəbini və “Neftçi” klubunu təmsil edən 30-dan çox iştirakçı 4 dəst mükafat uğrunda mübarizə aparıb.
Yarışın tamaşaçıları və qonaqları səhnədə çıxış edən gimnastları alqışlarla dəstəkləyiblər.
Aynur Hüseynova-Nərmin Ramazanova-Lalə Hüseynova qadın üçlüyünün qarışıq hərəkətləri birinciliyin yaddaqalan məqamı olub. Müsabiqədənkənar çıxış edən qadın akrobatlarımız dəqiq işlənmiş elementlər göstərərək zala toplaşanları heyran qoyublar. Yeri gəlmişkən, qadın akrobatlarımız Bakıda keçiriləcək 2015-ci ilin Avropa oyunlarında ölkəmizi təmsil edəcəklər.
Qarşıda bizi kişilər arasında idman gimnastikası üzrə dekabrın 5-nə planlaşdırılmış Azərbaycan və Bakı birləşmiş birinciliyi, habelə bədii gimnastika üzrə dekabrın 11-12-də keçiriləcək Azərbaycan birinciliyi və Bakı çempionatı gözləyir. Yarışların hər ikisi Milli Gimnastika meydanında keçiriləcək.
Bölmənin digər xəbərləri
