ALİ MƏKTƏBLƏRƏ QƏBUL İMTAHANLARINDA 700 BAL TOPLAYAN SUMQAYITLI ABİTURİYENTLƏRƏ MƏNZİL HƏDİYYƏ OLUNACAQ
Sumqayıt, 3 fevral (AZƏRTAC). Ali məktəblərə qəbul imtahanları zamanı maksimum - 700 bal toplayan hər bir sumqayıtlı abituriyentə mənzil hədiyyə olunacaqdır. Bunu Sumqayıt Şəhər İcra Hakimiyyətinin başçısı Vaqif Əliyev Gənclər gününə həsr olunmuş tədbirdə bildirmişdir.
Məlum olduğu kimi, cari dərs ilinin əvvəlində şəhər rəhbərliyi sumqayıtlı birinci kurs tələbələri ilə görüş keçirmişdi. Görüşdə 700 balla Azərbaycan Prezidenti yanında Dövlət İdarəçilik Akademiyasına daxil olan Elvin Dadaşov öz sevincini bölüşmüşdü. Sumqayıt gimnaziyası məzununun yataqxanada yaşayan ailə üzvləri görüşə dəvət alanda yataqxanaya deyil, təzə mənzilə dönəcəklərini ağıllarına belə gətirmirdilər. Sadə fəhlə ailəsindən olan gəncin zəhməti və biliyi Azərbaycan Prezidenti İlham Əliyev tərəfindən yüksək qiymətləndirilmişdi. Həmin gün Sumqayıt Şəhər İcra Hakimiyyətinin başçısı Vaqif Əliyev gurultulu alqış sədaları altında yeni tikilmiş binada 93 kvadratmetr sahəsi olan mənzilin açarlarını və orderini Elvin Dadaşova təqdim etmişdi.
Təkcə ötən il ondan yuxarı gənc istedad şəhərdə tikilən yeni binalarda mənzillə təmin edilmişlər.
Bölmənin digər xəbərləri
