Almaniyada iki nəfəri qətlə yetirən miqrant psixiatriya xəstəxanasına yerləşdirilib
Berlin, 24 yanvar, AZƏRTAC
Almaniyanın Bavariya əyalətindəki Aşaffenburq qəsəbəsində bıçaqlı hücumu törədən 28 yaşlı əfqan miqrant məhkəmənin qərarı ilə müvəqqəti olaraq psixiatriya xəstəxanasına yerləşdirilib.
AZƏRTAC xəbər verir ki, Enamullah O. biri azyaşlı olmaqla iki nəfəri qətlə yetirməkdə və üç nəfərə xəsarət yetirməkdə təqsirləndirilir.
Onun əvvəllər də bir neçə cinayət əməli törətdiyi müəyyən edilib. Belə ki, qaçqınların qəbulu mərkəzində dava və 2023-cü ilin martında qəsdən xəsarət yetirmə ilə əlaqədar ona cərimə cəzası tətbiq edilib. O, həmçinin saxta biletdən istifadə etdiyi üçün dələduzluq əməlində təqsirli bilinib. Onun barəsində əmlaka ziyan vurmaq, polis əməkdaşlarına qarşı zorakılıq və digər əməllərə görə məhkəmə araşdırması davam edir. Prokurorluq bu hadisələrlə əlaqədar onun barəsində həbs qətimkan tədbirinin seçilməsi üçün hüquqi zəminin olmadığını açıqlayıb. Onun psixi vəziyyəti və öz istəyi ilə ölkəni tərk etmək barədə müraciəti ilə əlaqədar barəsindəki araşdırmalar təxirə salınıb. Ümumilikdə o, polis tərəfindən iki dəfə ruhi xəstəliklər xəstəxanasına yerləşdirilib.
Xatırladaq ki, Enamullah O. yanvarın 22-də Aşaffenburq qəsəbənin mərkəzindəki parkda aralarında azyaşlıların da olduğu bir qrup şəxsə bıçaqla hücum edib. Hadisə nəticəsində iki nəfər, o cümlədən iki yaşlı uşaq həlak olub. Ölənlərdən digərinin isə hücuma mane olmağa çalışan yoldan keçən 41 yaşlı şəxs olduğu bildirilir. Hücum nəticəsində üç nəfər də xəsarət alıb. Bu hadisədən sonra Almaniyanın rəsmiləri və aparıcı siyasi partiyaların rəhbərləri ölkədə qanunsuz miqrasiyaya qarşı təcili və sərt tədbirlərin görülməsini tələb ediblər.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
