Almaniyanın Bad Zalçuflen şəhərində 20 Yanvar faciəsi qurbanlarının xatirəsini anma mərasimi keçirilmişdir
Bad Zalçuflen, 16 yanvar (AZƏRTAC). Azərbaycanın müasir tarixinə ən faciəli günlərdən biri kimi daxil olmuş, eyni zamanda, xalqımızın qəhrəmanlıq salnaməsinə parlaq səhifə kimi yazılmış, azadlığımız, müstəqilliyimiz uğrunda mübarizəsinin və yenilməz iradəsinin rəmzinə çevrilmiş Qanlı Yanvar hadisələrindən 24 il keçir.
Xəbər verildiyi kimi, bununla əlaqədar Azərbaycan Respublikası Prezidenti Administrasiyasının rəhbəri, akademik Ramiz Mehdiyev “20 Yanvar faciəsinin iyirmi dördüncü ildönümünün keçirilməsi ilə bağlı tədbirlər planı” barədə sərəncam imzalamışdır. Bu sənədə əsasən, ölkənin bütün şəhər və rayonlarında 20 Yanvar hadisələri ilə bağlı toplantı, konfransların təşkil edilməsi, o cümlədən diaspor təşkilatları və qurumları tərəfindən xarici ölkələrdə tədbirlərin keçirilməsi planlaşdırılır.
Bu tədbirlər planını rəhbər tutularaq Almaniyanın Bad Zalçuflen şəhərində 20 Yanvar faciəsinin 24-cü ildönümü münasibətilə faciə qurbanlarının xatirəsini anma mərasimi keçirilmişdir. Almaniyanın Nordreyn-Vestfalen federal əyalətində fəaliyyət göstərən Alman-Azərbaycan Mədəniyyət Cəmiyyətinin dəstəyi ilə təşkil edilmiş bu tədbirdə Hannover, Hamburq, Minden, Herford və Almaniya Federativ Respublikasının digər şəhərlərindən gəlmiş 120-dən çox həmvətənimiz, türk və alman qonaqlar iştirak etmişlər.
Tədbir çərçivəsində qanlı 20 Yanvar hadisələrini əks etdirən fotosərgi təşkil edilmiş, Azərbaycan, Türkiyə və Almaniyanın dövlət bayraqları endirilmişdir.
Anma mərasiminin təşkilatçısı, Alman-Azərbaycan Mədəniyyət Cəmiyyətinin sədri Təranə Tağıyeva gecəni giriş sözü ilə açaraq Nordreyn-Vestfalen federal əyalətində məskunlaşmış Azərbaycan icması adından tədbir iştirakçılarını salamlamışdır.
20 Yanvar şəhidlərinin əziz xatirəsi bir dəqiqəlik sükutla yad edilmişdir.
Sonra tədbirin aparıcısı Etibar Qəniyev xalqımızın qan yaddaşına silinməz faciə kimi yazılmış 20 Yanvar hadisələrini doğuran səbəblər, bu faciənin Azərbaycan milli-azadlıq hərəkatında yeri və rolu haqqında ətraflı məlumat vermişdir. Bildirmişdir ki, keçmiş SSRİ rəhbərlərinin göstərişinə əsasən, həyata keçirilmiş xüsusi hərbi əməliyyat nəticəsində bir neçə istiqamətdən Bakıya daxil olan silahlı qoşunlar milliyyətindən, yaşından və cinsindən asılı olmayaraq, 147 nəfər silahsız mülki şəxsi amansızcasına öldürmüş, paytaxtda, şəhərətrafı qəsəbələrdə və rayonlarda 744 dinc, günahsız insan yaralanmış, yüzlərlə adam itkin düşmüş, 841 nəfər qanunsuz həbs edilmişdir.
E.Qəniyev sözünə davam edərək bildirmişdir ki, həmin vaxt Moskvada yaşayan ümummilli liderimiz Heydər Əliyev qətliamdan bir gün sonra, 1990-cı il yanvarın 21-də həyatını təhlükə qarşısında qoyaraq Azərbaycanın Moskvadakı nümayəndəliyinə gəlmiş, baş vermiş faciə ilə əlaqədar Azərbaycan xalqına başsağlığı vermişdir. Ümummilli Liderimiz mətbuat konfransı keçirərək sabiq SSRİ prezidenti M.Qorbaçov başda olmaqla bütün hakimiyyət nümayəndələrini cinayətkar adlandırmış, günahkarların cəzalandırılmasını tələb etmiş və bu vəhşiliyə etiraz əlaməti olaraq Kommunist Partiyası sıralarından çıxdığını bəyan etmişdir.
Daha sonra Bielefeld şəhərindəki Göy məscidin axundu, ilahiyyatçı Elşən İsmayıllı islam dininin müqəddəs kitabı olan Qurani-Kərimdən surələr oxumuş, Fatihə surəsi ilə Azərbaycanın müstəqilliyi və suverenliyi uğrunda şəhid olanların ruhunu yad etmişdir.
Anma mərasimində iştirak edən ağsaqqal Ramazan Məmmədov xalqın haqq işinin müdafiəsi uğrunda Bakı şəhərinin küçələrinə çıxmış dinc əhalinin qəddarcasına qətlə yetirilməsi, şahidi olduğu hadisələr haqqında ürək ağrısı ilə öz xatirələrini həmvətənləri ilə bölüşmüş, şəhidlərimizə həsr edilmiş şeirini oxumuşdur.
Bielefeld şəhərindən gəlmiş İsmayıl Nefis bütün türk dünyasının faciəsinə çevrilən qanlı 20 Yanvar hadisələri ərəfəsində Azərbaycanda və eləcə də keçmiş SSRİ-də mövcud ictimai-siyasi vəziyyət barədə çıxış etmişdir.
Ulu öndərimiz Heydər Əliyevin “Bir millət, iki dövlət” müdrik kəlamını xatırladan iş adamı Adem Yavuz Tumay Azərbaycan diasporu ilə türk diaspor təşkilatlarının sıx birliyinin belə matəm günlərində mübariz təzahürünü vurğulamışdır.
1980-cı illərin sonlarında Azərbaycanda ictimai-siyasi vəziyyətin kəskinləşməsinin əsas səbəblərindən biri kimi də Ermənistanın Azərbaycan qarşı ərazi iddiaları ilə çıxış etməsinin vurğulandığı mərasimdə ümummilli liderimiz Heydər Əliyevin siyasi kursunun layiqli davamçısı Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Ermənistan tərəfindən işğal olunmuş torpaqlarımızın azad olunması ilə bağlı bəyanatı iştirakçıların diqqətinə çatdırılmışdır: “Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir. Azərbaycan öz doğma torpaqlarını nəyin bahasına olursa-olsun, azad edəcəkdir”.
Nordreyn-Vestfalen Alman-Azərbaycan Cəmiyyəti idarə heyətinin üzvü Faiq Məmmədov sovet imperiyasına məxsus hərbi birləşmələrin 1990-cı ilin yanvar ayında Bakıda, Cəlilabadda, Lənkəranda və digər rayonlarda Azərbaycan xalqına qarşı törətdiyi cinayətin misli görünməmiş bir vəhşilik olduğunu vurğulamış, sözünü Ümumxalq Hüzn gününə həsr edilmiş şeiri ilə bitirmişdir.
Daha sonra 20 Yanvar hadisələri ətrafında geniş diskussiya və fikir mübadiləsi aparılmış, məruzəçilər tərəfindən tədbir iştirakçılarını maraqlandıran suallar cavablandırılmışdır.
Anma mərasimində şəhidlərin xatirəsinə ehsan verilmişdir.
Tədbirin sonunda Nordreyn-Vestfalen Alman-Azərbaycan Mədəniyyət Cəmiyyətinin sədri Təranə Tağıyeva xalqımızın kədərinə şərik olduqlarına görə iştirakçılara təşəkkürünü bildirmiş, qarşıda duran vəzifələr, o cümlədən fevral ayında Xocalı soyqırımının 22-ci ildönümünə həsr edilmiş və Bielefeld şəhərində keçiriləcək yürüş haqqında həmvətənlərimizi məlumatlandırmış və onları yekdilliklə bu aksiyaya qoşulmağa dəvət etmişdir.
Vüqar Seyidov
AZƏRTAC-ın xüsusi müxbiri
Bad Zalçuflen
Bölmənin digər xəbərləri
