Anadolu Agentliyi Formula 1 Azərbaycan Qran-Prisi barədə geniş məlumat yayıb
İstanbul, 29 aprel, AZƏRTAC
Türkiyənin Anadolu Agentliyi Formula 1 Azərbaycan Qran-Prisi barədə geniş məlumat yayıb.
AZƏRTAC xəbər verir ki, məlumatda Azərbaycan Qran-Prisinin qalibi adını “Mercedes” komandasının sürücüsü Luis Hamiltonun əldə etdiyi bildirilir. Qeyd edilir ki, Luis Hamilton bu qələbə sayəsində Formula 1 üzrə dünya çempionatında liderliyə yüksəlib.
Prezident İlham Əliyevin, birinci xanım Mehriban Əliyevanın və ailə üzvlərinin Formula 1 üzrə dünya çempionatının dördüncü mərhələsinin - Azərbaycan Qran-Prisinin əsas yarışına baxdıqları türkdilli oxucuların diqqətinə çatdırılır.
Anadolu Agentliyi yarışın gedişi, digər yerləri tutmuş pilotlar haqqında da ətraflı məlumat verir. Agentlik yarış prosesini əks etdirən 33 şəkildən ibarət fotosessiya da təqdim edib. Bu fotolar təkcə yarışın əzəmətini yox, eyni zamanda, paytaxtımızın gözəlliyini, tarixi binalarını və müasir görkəmini də əks etdirir.
Qran-Prinin qalibi Luis Hamiltona kuboku Azərbaycan Respublikasının Prezidenti İlham Əliyevin təqdim etdiyi bildirilir.
Məlumatda qeyd edilir ki, Formula 1 üzrə dünya çempionatının beşinci mərhələsi mayın 11-13-də İspaniyanın Barselona şəhərində keçiriləcək.
Sabir Şahtaxtı
AZƏRTAC-ın xüsusi müxbiri
İstanbul
Bölmənin digər xəbərləri
