Bakı, 29 aprel, AZƏRTAC

Mayın 5-də Azərbaycan Dövlət Akademik Milli Dram Teatrında Cəlil Məmmədquluzadənin “Anamın kitabı” əsəri əsasında səhnələşdirilən eyniadlı tamaşa növbəti dəfə nümayiş olunacaq.

Teatrdan AZƏRTAC-a bildirilib ki, tragikomediyanın quruluşçu rejissoru Firudin Məhərrəmov, quruluşçu rəssamı isə Ülviyyə Zərbəliyevadır.

Səhnə əsəri adından məlum olduğu kimi ana dili haqqındadır. Ananın üç oğlu və bir qızı var. Biri ingilis, digəri rus, biri də fars dili üzrə təhsil alıb. Ana yeganə qızının gələcək taleyini oğlanlarından heç biri ilə həll edə bilmir. Obrazlı desək, ananın kitabını heç bir oğul oxumur. Çünki bu oğullar nə anaya, nə də Vətənə layiq övlad kimi yetişməyiblər.

Biletləri iTicket.az saytı və şəhərin kassalarından əldə etmək mümkündür.