Antoni Blinken: Rusiyanın İrandan aldığı ballistik raketlər Avropa üçün təhdiddir
London, 10 sentyabr, AZƏRTAC
Böyük Britaniyanın xarici işlər naziri Devid Lammi və ABŞ-ın Dövlət katibi Antoni Blinken Ukraynaya birgə səfər edəcəklər.
AZƏRTAC xəbər verir ki, Antoni Blinken və Devid Lammi Londonda keçirdikləri danışıqlar zamanı Ukraynaya dəstək göstərməyin vacib olduğunu vurğulayıblar. Onlar Rusiyanın Ukraynaya hücumlarının artacağına dair xəbərdarlıq ediblər.
Devid Lammi bildirib ki, bu, on il ərzində ilk birgə səfər olacaq və Qərbin Ukraynaya bağlılığını nümayiş etdirəcək.
ABŞ Dövlət katibi isə deyib ki, İran Rusiyaya qısamənzilli ballistik raketlər göndərib və Kreml çox güman, onlardan bir neçə həftə ərzində Ukraynada istifadə edəcək. Bunu bütün Avropa üçün təhdid adlandıran Antoni Blinken əlavə edib: “Onlarla Rusiya hərbçisi İranda 75 mil (təxminən 120 kilometr) uzaqlığa çata bilən qısamənzilli ballistik raket sistemindən istifadə etmək üçün təlim keçib”.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
