AQTA rəsmisi Cenevrədə Qida Standartları Komissiyasının 49-cu sessiyasında iştirak edir
Bakı, 6 iyul, AZƏRTAC
İyulun 6-da İsveçrə Konfederasiyasının Cenevrə şəhərində BMT-nin Ərzaq və Kənd Təsərrüfatı Təşkilatı (FAO) və Ümumdünya Səhiyyə Təşkilatının (ÜST) birgə təşkilatçılığı ilə Qida Standartları Komissiyasının (Codex Alimentarius Commission) 49-cu sessiyası öz işinə başlayıb. Ölkəmizi Azərbaycan Respublikası Qida Təhlükəsizliyi Agentliyinin (AQTA) sədr müavini Zəkiyyə Mustafayeva, Azərbaycan Qida Təhlükəsizliyi İnstitutunun İdarə Heyəti sədrinin müavini Ramazan Nəbiyev və institutun Elmi Araşdırmalar Mərkəzinin mütəxəssisi Aygün Qənbərzadə təmsil edirlər.
Bu barədə AZƏRTAC-a AQTA-nın İnformasiya təminatı və innovativ həllər şöbəsindən məlumat verilib.
Bildirilib ki, iyulun 10-dək davam edəcək sessiyada qida təhlükəsizliyi və beynəlxalq qida standartlarının təkmilləşdirilməsi ilə bağlı mühüm məsələlər müzakirə olunur.
Sessiyanın gündəliyinə Kodeks Prosessual Təlimatına ediləcək dəyişikliklər, 2020–2025-ci illəri əhatə edən Kodeks strateji planının icrasına dair hesabat, Komissiyanın büdcə və maliyyə məsələləri, həmçinin Kodeksin ixtisaslaşmış komitələri tərəfindən hazırlanmış yeni təkliflərin təsdiqi daxildir. Tədbir çərçivəsində Balıq və Balıq Məhsulları üzrə Kodeks Komitəsinə sədr ölkənin müəyyənləşdirilməsi məqsədilə seçkilərin keçirilməsi də nəzərdə tutulur.
Görüşlər zamanı Azərbaycanın FAO-nun və ÜST-nin Avropa üzrə Koordinasiya Komitəsinin növbəti koordinator ölkəsi seçilməsi istiqamətində fəaliyyət də diqqət mərkəzindədir. Bu çərçivədə üzv dövlətlərin nümayəndələri ilə ikitərəfli görüşlər keçirilir,
Azərbaycanın koordinatorluq dövründə həyata keçirəcəyi fəaliyyət istiqamətləri və prioritetləri təqdim olunur, müvafiq strategiya üzv ölkələrlə müzakirə edilir.
Bölmənin digər xəbərləri
