BDU-da Türk dövlətlərinin xarici siyasətinə həsr olunan yeni magistr ixtisaslaşması açılır
Bakı, 6 iyul, AZƏRTAC
2026/2027-ci tədris ilindən Bakı Dövlət Universitetinin (BDU) Beynəlxalq münasibətlər və iqtisadiyyat fakültəsində magistratura səviyyəsində “Türk dövlətlərinin xarici siyasəti və inteqrasiya prosesləri” ixtisaslaşması üzrə kadr hazırlığına başlanılacaq.
BDU-dan AZƏRTAC-a bildirilib ki, Türk dövlətləri arasında siyasi, iqtisadi və humanitar əməkdaşlığın genişlənməsi, regional inteqrasiya proseslərinin sürətlənməsi və beynəlxalq münasibətlər sistemində Türk dünyasının rolunun artması bu istiqamətdə yüksəkixtisaslı mütəxəssislərə tələbatı artırır. Bu baxımdan yeni ixtisaslaşmanın yaradılması həm elmi, həm də praktiki əhəmiyyət daşıyır. Yeni ixtisaslaşma çərçivəsində Türk dünyasında siyasi, iqtisadi və mədəni əməkdaşlıq mexanizmləri, türk dövlətlərinin xarici siyasət prioritetləri, regional inteqrasiya prosesləri öyrəniləcək, bu sahə üzrə peşəkar mütəxəssislər hazırlanacaq. Magistrantlar Türk Dövlətləri Təşkilatının fəaliyyət istiqamətləri, türk dövlətlərinin xarici siyasət strategiyaları, regional təhlükəsizlik, inteqrasiya modelləri, beynəlxalq əməkdaşlıq mexanizmləri, iqtisadi və humanitar əlaqələrin inkişafı ilə bağlı nəzəri bilik və praktiki bacarıqlara yiyələnəcəklər.
Tədris prosesində magistrantlara beynəlxalq münasibətlərin müasir nəzəriyyələri və regional inteqrasiya modelləri əsasında analitik araşdırmalar aparmaq, beynəlxalq layihələrdə iştirak etmək, elmi-tədqiqat fəaliyyəti ilə məşğul olmaq və müasir çağırışlara uyğun peşəkar bacarıqlar formalaşdırmaq imkanı yaradılacaq.
Bildirilib ki, ixtisaslaşmanın məzunları dövlət qurumlarında, diplomatik nümayəndəliklərdə, beynəlxalq və regional təşkilatlarda, analitik mərkəzlərdə, elmi-tədqiqat institutlarında, ali təhsil müəssisələrində, eləcə də Türk dünyası ilə bağlı layihələrin həyata keçirildiyi müxtəlif platformalarda fəaliyyət göstərə biləcəklər.
Yeni ixtisaslaşma Türk dünyasında inteqrasiya proseslərinin elmi əsaslarla öyrənilməsinə, regional əməkdaşlığın möhkəmləndirilməsinə və beynəlxalq münasibətlər sahəsində yüksəkixtisaslı mütəxəssislərin hazırlanmasına mühüm töhfə verəcək.
Bölmənin digər xəbərləri
