Fırçanın sözlə dialoqu: Altay Hacıyev yaradıcılığında Natəvan obrazı
AZƏRTAC Xurşidbanu Natəvana həsr olunan yazılar silsiləsini davam etdirir
Bakı, 6 iyul, AZƏRTAC
Xalq rəssamı Altay Hacıyevin “Xurşidbanu Natəvan övladları ilə” əsəri Natəvanın həyatındakı ən mühüm mövzulardan biri olan analıq hissinə həsr edilib. Kompozisiyanın mərkəzində Natəvan, onun ətrafında isə övladları təsvir olunub. Burada şairə və ya xan qızı deyil, ana obrazı ön plana çəkilir. Rəssamın yumşaq rənglərdən istifadə etməsi əsərə xüsusi həzinlik verir. Fiqurlar arasında sərt sərhədlərin olmaması ailə birliyini və mənəvi yaxınlığı ifadə edir. Natəvanın övladlarına yönələn baxışlarında həm sevgi, həm də qoruyuculuq hiss olunur. Bu xüsusiyyət əsərin emosional təsirini artırır. Əsər Natəvan şəxsiyyətinin daha az tanınan tərəfini – ana obrazını üzə çıxarır.
Bunu AZƏRTAC-a açıqlamasında Azərbaycan Dövlət Mədəniyyət və İncəsənət Universitetinin (ADMİU) Təsviri sənət tarixi və nəzəriyyəsi kafedrasının müdiri, sənətşünaslıq üzrə fəlsəfə doktoru, dosent Aslan Xəlilov söyləyib.
Altay Hacıyevin “Qasım bəy Zakir və Xurşidbanu Natəvan” əsəri barədə də danışan dosent deyib: “Bu, Azərbaycan ədəbi mühitinə həsr olunan maraqlı kompozisiyalardan biridir. Burada iki böyük ədəbi şəxsiyyət arasında mənəvi əlaqə təsvir edilib. Kompozisiyada əsas vurğu onların fiziki yaxınlığına deyil, fikir və söz birliyinə yönəlib. İşıq və rəng həlli obrazları fonla birləşdirərək onları tarixi xatirə səviyyəsinə qaldırır. Natəvan burada sadəcə dinləyici və ya söhbət iştirakçısı deyil, Azərbaycan poeziyasının davamçısı kimi təqdim olunur. Əsərin əsas ideyası ədəbi ənənələrin nəsildən-nəslə ötürülməsini göstərməkdir.
O, Xalq rəssamının “Xurşidbanu Natəvan kitab ilə” əsərinin Natəvanın poetik mahiyyətinin ən uğurlu ifadələrindən biri olduğunu qeyd edib. “Əsərdə kitab obrazın mərkəzi elementinə çevrilib. Natəvanın kitabı tutması sadəcə oxu prosesi deyil, mənəvi dünyaya daxilolma aktıdır. Qırmızı və narıncı rənglərin üstünlük təşkil etməsi daxili enerji və yaradıcılıq qüvvəsini simvolizə edir. Uçan quşlar isə ilhamın və azad fikrin rəmzidir. Burada Natəvan söz sənətinin daşıyıcısı, mənəvi işıq mənbəyi kimi təqdim olunur”, - A.Xəlilov əlavə edib.
Müxbir – Fidan Əlizadə
Bölmənin digər xəbərləri
