Altıncı “Yüksəliş” müsabiqəsinin yarımfinal mərhələsi başa çatıb
Bakı, 6 iyul, AZƏRTAC
Altıncı “Yüksəliş” müsabiqəsinin yarımfinal mərhələsi başa çatıb.
Müsabiqənin işçi qrupundan AZƏRTAC-a bildirilib ki, Bakı Ekspo Mərkəzində keçirilən yarımfinal mərhələsində əvvəlki mərhələləri uğurla başa vuran 331 iştirakçı finala vəsiqə qazanmaq uğrunda mübarizə aparıb.
Tədbirdə çıxış edən gənclər və idman nazirinin müavini, “Yüksəliş” müsabiqəsinin işçi qrupunun rəhbəri Fərhad Hacıyev bildirib ki, yarımfinal mərhələsinə yüksəlmək iştirakçıların bilik, bacarıq və idarəetmə potensialının göstəricisidir. “Yüksəliş” müsabiqəsi ölkənin gələcək idarəçilərinin üzə çıxarılması, onların inkişafının dəstəklənməsi və idarəçilik potensialının gücləndirilməsi baxımından əhəmiyyətli layihədir.
Xatırladaq ki, bu il keçirilən müsabiqənin konsepti Azərbaycan Prezidenti İlham Əliyevin müvafiq Sərəncamı ilə elan olunmuş “Şəhərsalma və Memarlıq İli”nə həsr edilib. Üç gün davam edən yarımfinal mərhələsində namizədlər 9 səriştə üzrə qiymətləndirilib. Bu səriştələrə strateji düşüncə, effektiv liderlik, qərarvermə, nəticəyönümlülük, işin effektivliyinin idarə edilməsi, adaptivlik, innovativ düşüncə, komanda işi və əməkdaşlıq, etika və dürüstlük daxildir. Qiymətləndirmə ekspertlər tərəfindən həyata keçirilib.
Qeyd edək ki, yarımfinal mərhələsinə hazırlıq çərçivəsində qiymətləndirici ekspertlər üçün üçgünlük təlim proqramı təşkil olunub. Təlimlərə 100-ə yaxın ekspert cəlb edilib. Ekspertlər real imtahan mühitinə yaxınlaşdırılmış simulyasiya olunmuş situasiyalar üzərindən iştirakçıların bacarıqlarının qiymətləndirilməsi, qiymətləndirmə meyarları, qiymətləndirmə mərkəzlərinin fəaliyyəti və ekspertlərin funksiyaları barədə ətraflı məlumatlandırılıblar.
Qiymətləndirmə prosesi beynəlxalq təcrübəyə əsaslanan və obyektivliyi ilə seçilən “Qiymətləndirmə konfransı” - “Assessment Conference” metodu ilə həyata keçirilib. Bu metod hər bir iştirakçının performansına çoxşaxəli yanaşmanı təmin edir və yekun qərarların kollegial əsasda verilməsinə imkan yaradır.
Yarımfinal mərhələsinin nəticələrinin növbəti 3-5 iş günü ərzində açıqlanması nəzərdə tutulur.
Qeyd edək ki, 100-ə yaxın iştirakçı final mərhələsinə keçid hüququ qazanacaq. VI “Yüksəliş” müsabiqəsinin final mərhələsi iyulun 17-dən 19-dək keçiriləcək.
“Yüksəliş” müsabiqəsi Prezident İlham Əliyevin 2019-cu il 26 iyul tarixli Sərəncamına əsasən təsis olunub. Müsabiqənin qalibləri mentorlar tərəfindən birillik fərdi inkişaf planı və özünüinkişaf üçün 20 min manat məbləğində pul mükafatı əldə edirlər.
Altıncı “Yüksəliş” müsabiqəsinin keçirilməsi ilə bağlı Prezident İlham Əliyev tərəfindən 2025-ci il dekabrın 10-da Sərəncam imzalanıb.
Bölmənin digər xəbərləri
