Psixoloq: Uşaqların sosial şəbəkələrdən asılılığının qarşısını almaq üçün birgə iş vacibdir
Bakı, 6 iyul, AZƏRTAC
Düşünürəm ki, sosial şəbəkələrlə bağlı yeni qanun layihəsi uşaqların rəqəmsal mühitdə daha yaxşı qorunması baxımından müsbət addımdır.
Bu fikri AZƏRTAC-a açıqlamasında psixoloq Lamiyə Əhmədli-Şirinova səsləndirib.
Hazırda sosial şəbəkələrin uşaqların həyatının bir hissəsinə çevrildiyini diqqətə çatdıran psixoloq deyib: “Məqsəd onları tam qadağan etmək yox, düzgün və təhlükəsiz istifadə etməyi öyrətmək olmalıdır”.
Psixoloqun müşahidələrinə görə, ən yaxşı nəticə valideyn nəzarəti, açıq ünsiyyət və sağlam sərhədlər olduqda əldə edilir. “Uşaq nə üçün müəyyən məhdudiyyətlərin qoyulduğunu başa düşəndə, bu qaydalara daha asan əməl edir”, - deyə o əlavə edib.
Lamiyə Əhmədli-Şirinova hesab edir ki, qanun müəyyən riskləri azaltmağa kömək edəcək. “Ancaq uşaqların sosial şəbəkələrdən asılılığının və ya zərərli məzmunun təsirinin qarşısını almaq üçün ailə, məktəb və mütəxəssislərin birgə işi vacib olaraq qalır. Bu məsələdə maarifləndirmə qanun qədər önəmlidir”, - deyə mütəxəssis bildirib.
Müəllif – Leyla Muradzadə
Bölmənin digər xəbərləri
