Bolqarıstanlı fermerlər Yunanıstanla sərhəd keçidini bağlayıblar
Bakı, 6 iyul, AZƏRTAC
Bolqarıstanlı fermerlər Yunanıstanla sərhəd-keçid məntəqəsində etiraz aksiyası keçirərək nəqliyyatın hərəkətini müvəqqəti dayandırıblar.
AZƏRTAC Bolqarıstanın BTA informasiya agentliyinə istinadla xəbər verir ki, etirazçılar sərhəd-keçid məntəqəsini üç dəfə bağlayıblar. Onlar çəkisi 3,5 tondan artıq olan yükdaşıyan maşınların sərhəddən keçməsinə icazə verilməsini tələb ediblər.
Etirazın təşkilatçısı mövcud məhdudiyyətin fermerlərin məhsullarının Yunanıstanda satılmasına mane olduğunu və avtobuslara da şamil edildiyi üçün turizmə mənfi təsir göstərdiyini qeyd edib.
Fermerlər bildiriblər ki, Bolqarıstanın Şengen zonasına qoşulmasından sonra sərhəd-keçid məntəqəsinin tam açılmasını dəfələrlə tələb etsələr də, hərəkət qaydaları hələ də 2007-ci il tarixli ikitərəfli saziş əsasında tənzimlənir.
Etirazçıların bazar günü sərhəd-keçid məntəqəsini tam bağlamağı planlaşdırdıqları bildirilir.
Bölmənin digər xəbərləri
