ARAZ AĞALAROV: AZƏRBAYCANIN GƏLƏCƏYİNƏ NİKBİNLİKLƏ BAXIRAM
Qurultayda Rusiyada yaşayan həmvətənlərimizin böyük bir qrupu da iştirak edəcəkdir. Onlardan biri öz fəaliyyəti ilə rusiyalılara yaxşı tanış olan moskvalı sahibkar Araz İsgəndər oğlu Ağalarovdur. O, “Krokus intənəşnl” Səhmdar Cəmiyyətinin prezidenti, Moskva Beynəlxalq Biznes Assosiasiyasının vitse-prezidenti, Beynəlxalq İnformatika Akademiyasının həqiqi üzvü, “Biznes i vıstavki” jurnalının baş redaktoru, Rusiyanın bazar iqtisadiyyatından bəhs edən və mütəxəssislərdə böyük maraq doğuran kitabların müəllifi və nəhayət, iqtisad elmləri namizədidir. O, praktik, iqtisadi fəaliyyətin yeni formalarının şahidi və iştirakçısı kimi bu yeniliyin təsirini öz üzərində, müəssisəsinin taleyində və nəzərdə tutduğu işlərdə bilavasitə hiss etmiş, nyu-yorklu akademik V.L.Kvintin təbirincə desək, əvvəllər heç kəsin etmədiyini gerçəkləşdirməyə, əvvəllər heç kəsin yaşamadığı şəraiti yaratmağa çalışan adamlardan biridir.
Biz Araz Ağalarovdan Rusiyada Azərbaycan diasporunun fəaliyyəti ilə bağlı bir sıra məsələlər barədə fikirlərini bölüşməyi xahiş etdik.
- Rusiyada məskən salmış azərbaycanlıların bir çoxu artıq bu ölkənin vətəndaşlarıdır. Siz bu ölkənin hərtərəfli inkişafında, Azərbaycanla Rusiya arasındakı ənənəvi dostluq münasibətlərinin möhkəmləndirilməsində onların rolunu necə görürsünüz?
- Mən bu suala bir qədər geniş mənada yanaşıb, təkcə etnik azərbaycanlılardan deyil, həm də digər xalqların təmsilçilərindən olan həmvətənlərimizdən - bütün dövrlərdə müxtəlif millətlərin və dinlərin nümayəndələrinin böyük bir ailə kimi yaşadığı Azərbaycanı öz tarixi vətəni hesab edən insanlar barədə də danışmaq istərdim. Taleyin hökmü ilə Vətənimizin hüdudlarından kənarda yaşayan bizlər, yəqin ki, bir nəcib məqsədə xidmət etməli, yurdumuz Azərbaycanı Rusiyanın bütün guşələrində daha mütəşəkkil və daha ləyaqətlə təmsil etməyə çalışmalıyıq. Qabiliyyətimizi, istedad və bacarığımızı bizi qəbul edən ölkənin rifahına yönəltməli, onun iqtisadiyyatının, elm və mədəniyyətinin, habelə sahibkarlığın inkişafına öz töhfəmizi verməliyik. Ədalət naminə deməliyəm ki, həmvətənlərimizin böyük əksəriyyəti bu vəzifənin öhdəsindən bacarıqla gəlir.
Zənnimcə, bunda xalqımızın dahi lideri Heydər Əliyevin təşəbbüsü ilə təsis olunan və Vətənimizin, həmvətənlərimizin rifahına yönəldilmiş siyasətin formalaşdırılmasına kömək edəcək təsirli lobbimizin yaranmasının əsasını təşkil edə biləcək nüfuzlu Azərbaycan diasporunun yaradılmasını nəzərdə tutan Ümumrusiya Azərbaycan Konqresinin böyük rolu var.
Rusiya ilə Azərbaycan arasında ticarət-iqtisadi, mədəni və sair əlaqələrin inkişafına və möhkəmləndirilməsinə, birgə iri iqtisadi və sosial layihələrin gerçəkləşdirilməsinə yardım göstərilməsinə gəldikdə isə vurğulamaq istəyirəm ki, həmvətənlərimiz Azərbaycanda baş verən ictimai-iqtisadi proseslərə yaxından maraq göstərir, tarixi Vətənimizin iqtisadi baxımdan yeniləşməsinə öz töhfələrini verməyi ürəkdən istəyirlər. ÜAK nəzdində yaradılan İqtisadi İnkişaf Fondu da bu məqsədə xidmət edir. Müəyyən mənada bu təşəbbüs dünyanı bürüyən inteqrasiya prosesi, qüvvələrin və imkanların birləşməsi ilə səciyyələnən zamanın hökmü ilə irəli sürülmüşdür. Məlumdur ki, əl-ələ verərək problemləri həll etmək, maneələri aradan qaldırmaq daha asan olur.
- Bir halda ki, söhbət iqtisadi məsələlərdən düşdü, gündəlik həyatında nəzəriyyəni təcrübə ilə birləşdirməyə çalışan tədbirli və işgüzar adam kimi, - gərək ki, Amerika alimi sizi məhz belə səciyyələndirmişdir, - sizin fikrinizcə, azad bazar iqtisadiyyatı quran Azərbaycan bu gün kənardan necə görünür?
- Vətənimiz Azərbaycanın bu istiqamətdə götürdüyü xəttin uğurlu olduğunu vurğulamaq mənim üçün xoşdur. Azərbaycan liderlik edir, özü də təkcə öz regionunda yox. Biz bununla fəxr edirik. Rəqəmləri gətirməyəcəyəm, onlar məlumdur. Azərbaycan həm ümumi daxili məhsul, həm sənaye məhsulu istehsalına, həm iqtisadiyyatına sərmayələr yatırılmasına və həm də bir sıra başqa göstəricilərə görə bir çox ölkələri qabaqlayır. Vergi və gömrük sistemləri təkmilləşdirilir, sərmayədarların həvəsləndirilməsi məsələləri həll olunur, sərmayə mühiti getdikcə daha da yaxşılaşır, - bu isə məlumdur ki, kapitalın artmasına təminat verir, - yeni mütərəqqi qanunlar qəbul edilir, çoxlu başqa işlər görülür. Bütün bu işlər yeganə əsas məqsəd - adamların rifahını yüksəltmək, onların həyatını firavan və gözəl etmək naminə görülür.
Yadınızdadırsa, ümumi Vətənimizdə bütün sahələrdə müşahidə olunan tərəqqini Azərbaycanda Rusiya İlinin açılışında iştirak etmək üçün Bakıya səfər edən Prezident Vladimir Putin də vurğulamışdı.
Təbii ki, yanlışlıqlar, hətta bəzi səhvlər də olur. İnkişaf yolunda bunlarla hamı qarşılaşır. Xoşbəxtlikdən, bu, Azərbaycanda xroniki hal almır, çünki onu operativ və əsaslı surətdə aradan qaldırmaq üçün inadlı səylər göstərilir.
Bir sözlə, mən bizim ümumi Vətənimizin gələcəyinə nikbinliklə baxıram.
- Dünya Azərbaycanlılarının II qurultayının iştirakçılarına nə arzulayardınız?
- Adətən, hamıya, ilk növbədə, sağlamlıq və əmin-amanlıq arzulayırlar. Elə mən də qurultayın bütün iştirakçılarına bunu diləyirəm. Madam ki, gözəl Bakıda bütün dünyadan olan həmvətənlərimiz toplaşırlar, mən onların hamısını və hər birini ayrı-ayrılıqda özlərinin uzaq və yaxın tarixi Vətənini unutmamağa, onu bütün işlərdə dəstəkləməyə, imkan daxilində ona xidmət etməyə çağırmaq istərdim.
Bölmənin digər xəbərləri
