ARDNŞ TƏMSİLÇİLƏRİ BALAKƏN VƏ ZAQATALADA OLMUŞDUR
Balakən rayonunun İtitala kəndində ARDNŞ-in vəsaiti hesabına tikiləcək məktəbin təməlqoyma mərasimi keçirilmişdir. Bakılı qonaqlar kəndin problemləri ilə maraqlanmış, sakinlərin arzu və təkliflərini öyrənmiş, mədəniyyət evi özfəaliyyət kollektivinin çıxışını dinləmişlər.
ARDNŞ təmsilçiləri rayonda tikilən müasir xəstəxana kompleksində, Şəhidlər xiyabanında, Mazımçay kənd məktəbində inşaat işlərinin gedişi ilə maraqlanmış, şirkətin rayonun sosial problemlərinin həllində bundan sonra da fəal iştirak edəcəyini bildirmişlər.
Qonaqlar Zaqatalada şirkətin hesabına inşa edilən müalicə-diaqnostika mərkəzində, bir sıra məktəblərdə olmuş, aparılan tikinti işləri ilə maraqlanmışlar. İngiloylar yaşayan Əliabad kəndinin mədəniyyət evində kəndin ziyalıları və ağsaqqalları ilə görüşdən sonra buradakı mədəniyyət evinin əsaslı təmir edilməsi, kənddə “Neftçi” İdman Cəmiyyətinin köməyi ilə müasir idman avadanlığının qurulması və müxtəlif idman dərnəklərinin yaradılması qərara alınmışdır.
Görüşlərdə rayonların sakinləri son vaxtlar aparılan geniş quruculuq işlərindən böyük razılıq hissi ilə söz açmış, regionun inkişafına göstərilən qayğı və diqqətə görə Azərbaycan dövlətinin başçısı İlham Əliyevə təşəkkür etmişlər.
