“Art Weekend” zamanı “Əcdadlar” sərgisi - keçmişin izləri müasir sənətdə canlanacaq
Bakı, 23 oktyabr, Gülay Nəzərova, AZƏRTAC
Bəzən bir rəng, bir xətt, bir naxış yüz illərin hekayəsini danışa bilər. Sanki sənət əsərləri zamanı aşaraq əcdadlarımızın düşüncələrinə, onların baxışına, yaşadığı hisslərə toxunmağa imkan yaradır. Bu hekayələri rənglərin sükutu və xətlərin ahəngi ilə hiss etmək mümkündür. Belə ki, oktyabrın 31-dən noyabrın 2-dək “Art Weekend” layihəsi çərçivəsində “Q Gallery Baku”da “Əcdadlar” sərgisi açılacaq. Burada Azərbaycan sənətinin müasir nümayəndələrini — Faiq Əhməd, Rəşad Ələkbərov, Orxan Hüseynov və Fərid Rəsulov öz yaradıcılıqları vasitəsilə keçmişin izlərini bu günə gətirəcək, tamaşaçıya milli ruhun dərin qatlarını yenidən hiss etdirməyə çalışacaqlar.
AZƏRTAC-ın müxbiri sərgi çərçivəsində layihədə iştirak edən sənətkarlarla həmsöhbət olub.
Hər portret tamaşaçının daxili dünyasına açılan bir pəncərədir
Faiq Əhməd bildirib ki, o, “Əcdadlar” sərgisində təqdim edəcəyi əsərləri daha çox minimal formada işləyib. Sənətkarın yaratdığı insan portretləri zahirən sadə görünsə də, dərin psixoloji qatlara malikdir. Bu portretlər tamaşaçını bir anlıq dayanmağa və baxdığı simada öz daxili hisslərini görməyə vadar edəcək. Hər kəs bu əsərlərdə fərqli bir duyğu, fərqli bir mənzərə kəşf edəcək.
Atalar sözlərinin vizual dili
Rəşad Ələkbərov sərgidə “Atalar sözləri” konsepti üzərində işləyir. O, xalqın dərin hikmətini əks etdirən sözləri vizual sənət vasitəsilə təqdim edir. Sənətçi vurğulayıb ki, bəzi atalar sözləri yalnız müəyyən zaman üçün deyil, gələcək nəsillər üçün də aktual qalır; 200 il sonra belə mənasını itirməyəcək hikmətləri daşıyır.
Rəşad Ələkbərov hazırda məhz belə bir atalar sözünü əsərində canlandırır: “Keçmə namərd körpüsündən qoy aparsın sel səni, yatma tülkü daldasında qoy yesin aslan səni”.
Məqsəd əcdadlarımızdan günümüzə gələn həyat və simvolizmi göstərməkdir
Fərid Rəsulov əsərlərində əsas mövzu kimi qoyunları təsvir edir. Onun sözlərinə görə, qoyunlar bir totem simvoludur: “Biz onların yunundan geyinir, ətini yeyir və gündəlik həyatda istifadə edirik. Genlərimizdə nəsildən-nəslə keçən mədəniyyətimiz var və bu, tarixdən günümüzə qədər zaman-zaman dəyişərək gəlib çatıb. Qoyun və quzu qədim zamanlardan bizim həyatımızın bir parçası olub; biz onlardan asılı yaşamış, köçəri həyat sürmüşük. Hətta qədim dövrlərə aid quzu heykəllərimiz də mövcuddur". O, diqqətə çatdırıb ki, sərgidə əsas məqsədi məhz bu əlaqəni — əcdadlarımızdan günümüzə gələn həyat və simvolizmi göstərməkdir.
Vətən mənzərələri ilə tarixə səyahət
Orxan Hüseynov tamaşaçını gündəlik həyatda çoxlarının artıq diqqət yetirmədiyi detalların içindən tarixə aparır. O bildirib ki, əsərlərində vətən mənzərəsi, doğma diyar, torpaq, göl və insanların yaşadığı, öyrəşdiyi ərazilər canlanır. Coğrafiya və məkanlar bir zamanlar əcdadlarımızın yaşadığı, izlər qoyduğu yerlər kimi təqdim olunur; indi isə biz həmin yerləri yaşayır, onları yenidən kəşf edirik.
Orxan Hüseynovun əsərləri tamaşaçını düşünməyə, ətrafını yenidən qiymətləndirməyə və öz köklərini hiss etməyə dəvət edir.
“Əcdadlar” sərgisi hər bir fərdin mənsub olduğu nəsillər zəncirindəki yerini dərk etməyə, gələcək nəsillərin formalaşmasında da iz buraxacağımızı xatırlamağa çağırır. Eyni zamanda, sərgi məkanın — yəni torpağın təkcə həyat beşiyi deyil, həm də sükutla əcdadlarımızın izlərini qoruyan bir yaddaş daşıyıcısı olduğunu vurğulayır.
Sərgi güclü və fərqli bədii ifadələr vasitəsilə izləyiciləri dərin fəlsəfi və emosional təəssüratlarla baş-başa buraxacaq.
Bölmənin digər xəbərləri
