AŞPA-NIN YAY SESSİYASINDA AZƏRBAYCANDA DEMOKRATİK PROSESLƏRİN GETDİYİ BİR DAHA VURĞULANMIŞDIR
Gündəliyin təsdiqindən sonra 2006-cı il yanvar ayında keçirilmiş iclasda Azərbaycan nümayəndə heyətinin mandatının səlahiyyəti ilə əlaqədar qəbul olunmuş 1480 saylı qətnamənin nəticəsi müzakirə edilmişdir. AŞPA-nın monitorinq komitəsinin üzvləri, Azərbaycan üzrə həmməruzəçilər A.Qross və A.Herkelin məruzələri dinlənilmişdir. Hər iki məruzəçi ölkəmizə qara yaxmaq ənənələrinə yenə sadiq qalmışlar. Onlar mayın 13-də keçirilmiş təkrar seçkilərdə müəyyən irəliləyişlər olduğunu bildirsələr də, Azərbaycanda demokratik vəziyyəti pis qələmə verən bəyanatla çıxış etmişlər.
Məruzə ətrafında müzakirələrdə Türkiyə, Almaniya, Böyük Britaniya, Yunanıstan və digər ölkələrdən olan deputatlar çıxış edərək, məruzəçilərin Azərbaycanla bağlı irəli sürdükləri fikirlə qətiyyən razılaşmadıqlarını bildirmiş, bir sıra problemlərin olmasına baxmayaraq, Azərbaycanın demokratik inkişafda xeyli irəliləyiş əldə etdiyini göstərmiş, may ayındakı təkrar seçkilər barədə AŞPA-nın müşahidəçilərinin müsbət rəyinin Azərbaycanda demokratiyanın inkişafna verilmiş bir rəy olduğunu vurğulamışlar. Onlar məruzəçilərin irəli sürdüyü bir sıra iddialarla razılaşmayaraq, məruzəni tənqid etmişlər.
Milli Məclisin nümayəndə heyətinin üzvü Gültəkin Hacıyeva çıxışında Azərbaycanda dövlətçiliyin inkişafında demokratik prinsiplərin vacibliyini xüsusi vurğulamış, Azərbaycan torpaqlarının Ermənistan tərəfindən işğal edilməsinin ölkəmizdə bir sıra problemlər yaratdığını xatırlatmışdır. Azərbaycanın, əslində, iki cəbhədə - həm demokratikləşmə, həm də ərazi bütövlüyünün bərpası istiqamətində mübarizə aparmalı olduğunu söyləyən G.Hacıyeva erməni işğalına dair çoxsaylı faktlar gətirmiş və bütün bunların məruzədə əks olunmamasından təəssüfləndiyini bidirmişdir.
Milli Məclisin nümayəndə heyətinin rəhbəri Səməd Seyidov isə demişdir ki, Azərbaycan özünü ideal demokratik ölkə saymır və daim inkişaf etmiş ölkələrin prinsiplərinin özündə bərqərar olmasına doğru addımlar atır. Müxalifətin fəaliyyətinə, onun öz sözünü demək imkanlarına daim əməl olunur. Prezident İlham Əliyevin ölkədə insan hüquqlarının qorunması istiqamətində atdığı addımlar həmişə Avropa Şurası və onun strukturları tərəfindən dəstəklənir.
Deputat Aydın Mirzəzadə çıxışında Avropa Şurasının bəzi qruplarının Azərbaycana qarşı ikili standartlar mövqeyindən yanaşmasının heç bir çərçivəyə sığmadığını, ölkəmiz demokratik istiqamətdə bir çox addımlar atsa da, nədənsə, bunların görünmədiyini, ancaq müəyyən nöqsanların qabardıldığını vurğulamışdır.
Azərbaycanlı deputat A.Qrossun və A.Herkelin irəli sürdüyü bir sıra iddialara cavab vermiş və demişdir ki, Azərbaycanda bir milyondan artıq qaçqın və məcburi köçkün olmasına baxmayaraq, həmməruzəçilər bir dəfə də olsun, ağır şəraitdə yaşamağa məcbur olmuş bu insanların taleyi ilə maraqlanmamışlar. Azərbaycanda 20 min jurnalistin bir nəfərinə qarşı cüzi zorakılıq göstəriləndə, nədənsə bu hal hər iki deputatın diqqətini həmin andaca cəlb edir, amma 8 milyon əhalidən bir milyonunun qaçqın və məcburi köçkün vəziyyətində yaşaması yada düşmür. A.Qrossun Azərbaycanda bir siyasi qüvvənin uzun müddət hakimiyyətdə qalmasına təəccüblənməsi ilə bağlı A.Mirzəzadə demişdir ki, seçkiyə gələnlər hakimiyyəti dəyişmək imkanları ilə yanaşı, hakimiyyəti saxlamaq imkanları da əldə edirlər. Əhalinin maddi vəziyyəti yaxşılaşdıqca, seçilən hakimiyyətin qalmasında maraqlı olur. A.Qrossun həqiqətə uyğun olmayan iddialarını tənqid edən azərbaycanlı deputat Azərbaycanın büdcəsinin 2003-cü ildəki 1 milyard dollardan 2006-cı ilin ilk dövrlərində 4,4 milyarda çatdığını, orta əmək haqqının artdığını xüsusi vurğulamış, ölkədə mənzil tikintisinin geniş vüsət aldığını, neft gəlirləri hesabına əhalinin güzəranının yüksəldiyini xatırlatmışdır.
Azərbaycanda siyasi qüvvənin uzun müddət hakimiyyətdə olmasına gəldikdə, A.Qrossun məntiqinə görə, Avropada 8-10 ildən artıq hakimiyyətdə olan siyasi qüvvələr təcili surətdə öz yerlərini müxalifətə verməlidirlər. Amma “demokratiya axtarışında olan” A.Qross, nədənsə, Avropadakı bu fakta göz yumur.
Deputatlarımızın səyi nəticəsində qətnamə layihəsi ilə əlaqədar verilmiş 10-a yaxın düzəlişin böyük bir hissəsi qəbul edilmişdir.
Ümumiyyətlə, Azərbaycanda gedən proseslər AŞPA deputatlarının əksəriyyəti tərəfindən dəstəklənmişdir. Ölkəmizlə bağlı məsələnin 2007-ci ilin yay sessiyasında müzakirə edilməsi qərara alınmışdır.
Bölmənin digər xəbərləri
