AŞPA-NIN YAYA SESSİYASI İŞƏ BAŞLAMIŞDIR

26.06.2006 [21:20]
Çap et
A⁺ A^-

AZƏRTAC-ın xüsusi müxbiri xəbər verir ki, iyunun 26-da Avropa Şurası Parlament Assambleyasının yay sessiya işinə başlamışdır. Sessiyada Milli Məclisin beynəlxalq münasibətlər və parlamentlərarası əlaqələr daimi komissiyasının sədri Səməd Seyidovun rəhbərlik etdiyi Azərbaycan deputat qrupu iştirak edir. Qrupa deputatlar Rəfael Hüseynov, Gültəkin Hacıyeva, Aydın Mirzəzadə, Elmira Axundova, Qənirə Paşayeva, Aydın Abbasov, Sabir Hacıyev və Fəzail İbrahimli daxildirlər. Günün birinci yarısında AŞPA bürosunun, ayrı-ayrı partiya qruplarının və müxtəlif komitələrin iclaslarında sessiyanın gündəliyinə çıxarılan məsələlər sonuncu dəfə müzakirə edilmişdir. Müzakirələrdə fəallıq göstərən deputatlarımız məsələlərlə bağlı ölkəmizin mövqeyini açıqlamışlar.

Azərbaycan nümayəndə heyətinin sədri Səməd Seyidov AZƏRTAC-ın müxbirinə bildirmişdir ki, yığıncaqda deputatlarımız öz həmkarlarına təkrar seçkilərin keçirilməsi, ölkədə aparılan demokratik islahatlar, Ermənistan tərəfindən işğal edilmiş ərazilərimizdə qəsbkarların son zamanlar kəndləri yandırması barədə ətraflı məlumat vermiş, bu vəhşiliyi əks etdirən fotoşəkilləri nümayiş etdirmişlər.

Azərbaycan nümayəndə heyətinin üzvləri AŞPA-nın sədri Rene van der Lindenlə də görüşmüşlər. Görüşdə deputatlarımız ölkəmizlə bağlı müzakirəyə çıxarılan məsələ barədə danışmış, işğal altındakı ərazilərimizdə ermənilərin törətdikləri yanğınlar barədə məlumat vermiş, kosmosdan və yaxın məsafədən çəkilmiş şəkilləri sədrə təqdim etmişlər.

Sədr baş verən hadisəni pisləmiş və bu məsələ ilə ciddi şəkildə maraqlanacağını bildirmişdir.

AŞPA-NIN YAYA SESSİYASI İŞƏ BAŞLAMIŞDIR

MÜƏLLİFLƏ ƏLAQƏ

Bölmənin digər xəbərləri