Atasına verdiyi vədi yaşadan Zəhra BDU tələbəsi oldu
Bakı, 27 avqust, AZƏRTAC
Uşaq vaxtı atasına “gələcəkdə səfir olacağam” deyən Zəhra Xəlilzadə bu gün həmin arzusu istiqamətində ilk böyük addımını atıb. Şəhid polkovnik-leytenant Vidadi Xəlilovun qızı Zəhra Xəlilzadə 533 balla Bakı Dövlət Universitetinin (BDU) Beynəlxalq münasibətlər və iqtisadiyyat fakültəsinin beynəlxalq münasibətlər ixtisasına qəbul olub. Atasının illər əvvəl söylədiyi “Hansı peşəyə yiyələnirsən, bu sənin öz seçimindir, ancaq onu layiqincə yerinə yetirməyi unutma” sözləri isə onun üçün bu yolda xüsusi məna daşıyır.
İ.Əfəndiyev adına Elitar Gimnaziyanın məzunu olan Zəhra məktəb illərində də uğurları ilə seçilib. Heydər Əliyevin 101 illiyinə həsr olunmuş “Ən yaxşı təqdimat” müsabiqəsində də 3-cü yeri tutub.
Zəhra Xəlilzadə AZƏRTAC-a müsahibəsində beynəlxalq münasibətlər ixtisasını seçməsinin səbəbindən danışıb.
“Uşaq vaxtı həmişə atama deyirdim ki, gələcəkdə səfir və ya diplomat olacağam. O da mənə gülümsəyib deyərdi: “Hansı peşəyə yiyələnirsən, bu sənin öz seçimindir, ancaq onu layiqincə yerinə yetirməyi unutma”. Ölkələri səyahət etməyi, daim özümü inkişaf etdirməyi, araşdırma aparmağı, yeni məlumatlar öyrənməyi, siyasəti və diplomatiyanı çox sevirəm. Ona görə düşündüm ki, mənim üçün ən doğru seçim beynəlxalq münasibətlər olacaq.
İmtahanlara isə çox sərt rejimdə hazırlaşdım. Bir müddət bütün sosial şəbəkələrdən uzaqlaşdım. Lakin zamanla səhhətimdə problemlər yaranmağa başladı. Anladım ki, istirahət etmək, vaxtdan düzgün istifadə etmək də vacibdir. Qrafikimi dəyişdim, vaxtımı düzgün bölməyə başladım və çox çalışmaq yox, düzgün çalışmaq metodunu kəşf etdim.
Şəkil çəkmək, mütaliə etməklə çətinliklərin öhdəsindən gəlməyə çalışırdım. Mən çox yaxşı əzbərçilik bacarığına malik idim. Hətta beş il musiqi məktəbində təhsil almışam. Müəllimim gözlərimi bağlayırdı ki, onun əllərinə baxmadan fortepiano ifa edim və musiqini duyum. Buna baxmayaraq, tarix dərsindən özümü həmişə zəif hiss edirdim və yüksək nəticə toplayacağıma şübhə ilə yanaşırdım. İmtahana az qalmışdı və mən şikayətlənməyə başladım ki, tarix fənnindən heç nə yaza bilməyəcəyəm. Bu fikrimi evdə anama danışdım, gecə yatdım və yuxuda gördüm ki, atam mənə tarix dərsindən test izahı verir və deyir: “Söz verirəm, bu dəfə səni tək qoymayacağam, geri qayıdacağam”. İmtahanda tarix fənni üzrə gözlədiyimdən də yüksək nəticə göstərdim. Mənim üçün ən maraqlı hadisə bu idi”, - deyə Zəhra Xəlilzadə qeyd edib.
Zəhranın sözlərinə görə, bu uğurun arxasında anasının da böyük zəhməti dayanır: “Yaşadığımız yer ilə hazırlığım arasında çox məsafə var idi. Dərs başlamazdan bir saat yarım əvvəl evdən çıxmalı olurdum. Səhhətimdəki narahatlığa görə avtobus və metrodan istifadə edə bilmirdim. Anam işdən həmişə tez çıxır, tələsik məni götürüb hazırlığa aparırdı. Üç-dörd saata yaxın soyuqda maşında mənim dərsdən çıxmağımı gözləyirdi. Bu uğurumun arxasında onun da əməyi var. Mən hər şeyə görə ona borcluyam. O, mənə yalnız ana yox, həm də ata oldu. Qəbul xəbərləri çıxanda isə çox sevindim. İlk olaraq anamın üzünə baxdım və gözlərim doldu. Çünki bunu bacarmaq üçün əlimdən gələni etmişdim”.
Beynəlxalq münasibətlər sahəsində dərin bilik və peşəkar bacarıqlar qazanmaq, xarici dil biliklərini inkişaf etdirmək istəyən Zəhra gələcəkdə uğurlu diplomat və beynəlxalq əlaqələr üzrə mütəxəssis olmağı qarşısına məqsəd qoyub.
Müxbir - Nərmin Muradzadə
Bölmənin digər xəbərləri
