Atçılıq Federasiyasında ötən ilin idman yekunlarına dair tədbir keçirilib
Bakı, 12 yanvar, AZƏRTAC
Azərbaycan Respublikası Atçılıq Federasiyasının təşkilatçılığı ilə Binə Atçılıq Mərkəzində (ARAF) 2015-ci ilin yekunlarına dair tədbir keçirilib.
AZƏRTAC xəbər verir ki, mərasimdə müxtəlif nominasiyalar üzrə ilin ən yaxşıları mükafatlandırılıblar.
Əvvəlcə ARAF-ın baş katibi Bəhruz Nəbiyevin 2015-ci ilin yekunlarına dair hesabat məruzəsi dinlənilib. Azərbaycan atçılığının hazırda intibah dövrünü yaşadığını deyən baş katib respublikada yeni idman qurğularının tikildiyini, Qarabağ və Dilbaz atlarının seleksiya proseslərinin davam etdiyini söyləyib.
Sonra il ərzində yüksək nailiyyətlər əldə etmiş idmançılar, məşqçilər, hakimlər və digər idman mütəxəssisləri diplom və mükafatlarla təltif ediliblər.
Mərasimdə çıxış edən ARAF-ın prezidenti Elçin Quliyev 2015-ci ilin Azərbaycan atçılıq idmanı üçün çox uğurlu keçdiyini bildirib. Atçılığın cıdır və konkur növləri üzrə müxtəlif turnirlərin, xüsusilə də beynəlxalq yarışların ötən il daha çox olduğunu qeyd edən federasiya prezidenti çövkən oyunu üzrə iki mötəbər yarışın müvəffəqiyyətlə keçirildiyini diqqətə çatdırıb.
Polo üzrə ölkəmizdə keçirilən Avropa çempionatını xatırladan E.Quliyev yarışın qalibi olmuş Azərbaycan seçməsinin uğurunu yüksək qiymətləndirib. Federasiya prezidenti ümidvar olduğunu bildirib ki, bu qələbə ölkəmizdə atçılığın inkişafına yeni təkan verəcək.
Sonra 2015-ci ildə ARAF-ın təşkil etdiyi beynəlxalq və respublika yarışları barədə videoçarx təqdim olunub.
İlin yekunlarına həsr olunan mərasim bədii hissə ilə başa çatıb.
Bölmənin digər xəbərləri
