Lautaro Martinez Milan derbisini buraxa bilər
Bakı, 15 oktyabr, AZƏRTAC
İtaliyanın “İnter” klubunun kapitanı və hücumçusu Lautaro Martinez zədələnib.
AZƏRTAC xəbər verir ki, bu barədə Milan təmsilçisinin mətbuat xidməti məlumat yayıb.
Bildirilib ki, 28 yaşlı argentinalı futbolçu Rozzano şəhərindəki Humanitas İnstitutunda tibbi müayinələrdən keçib. Müayinələrin nəticələrinə əsasən, onun sol budunun arxa əzələlərində dartılma aşkarlanıb.
Lautaro Martinez UEFA Çempionlar Liqasının “Brügge” ilə matçında zədələnib. Həmin görüşdə hücumçu iki qol vurub.
Klub futbolçunun yaşıl meydanlara qayıdacağı dəqiq vaxtı açıqlamayıb.
“Sky Sport”un məlumatına görə, argentinalı hücumçu yalnız noyabrda milli komandaların oyunları ilə əlaqədar yaranacaq fasilədən sonra meydana qayıda biləcək. Bu isə onun oktyabrın 31-də “Milan”a qarşı keçiriləcək derbidə iştirak etməyəcəyi deməkdir.
Qeyd edək ki, Lautaro Martinez cari mövsümdə “İnter”in heyətində keçirdiyi 7 oyunda 6 qol vurub.
Bölmənin digər xəbərləri
