Azərbaycan Türk dünyasının iqtisadi və enerji təhlükəsizliyinin təmin olunmasında mühüm rol oynayır - ŞƏRH
Bakı, 15 oktyabr, AZƏRTAC
Azərbaycan Türk dünyasının iqtisadi əlaqələrinin genişləndirilməsi, enerji təhlükəsizliyinin möhkəmləndirilməsi və siyasi koordinasiyanın gücləndirilməsi baxımından mühüm strateji mövqeyə malikdir. Ölkəmizin əlverişli coğrafi mövqeyi, zəngin enerji resursları və müasir nəqliyyat-logistika infrastrukturu Türk dövlətləri arasında əməkdaşlığın dərinləşməsinə, regional və beynəlxalq iqtisadi əlaqələrin inkişafına əhəmiyyətli töhfə verir.
Bunu AZƏRTAC-a açıqlamasında türk iqtisadçı-ekspert İlhan İşbaş bildirib.
Onun sözlərinə görə, Azərbaycanın rolu nəqliyyat dəhlizlərinin inkişafında və Türk dövlətlərinin vahid iqtisadi məkan ətrafında daha sıx əməkdaşlığında mühüm mövqeyə sahibdir.
“Azərbaycanın strateji əhəmiyyəti onun coğrafi mövqeyi, enerji potensialı və regional əməkdaşlıq təşəbbüslərinin bir-birini tamamlamasında özünü göstərir. Xəzər hövzəsini Qara dəniz və Aralıq dənizi istiqamətləri ilə birləşdirən enerji infrastrukturu, eləcə də Şərq-Qərb nəqliyyat marşrutlarının inkişafı ölkənin regional əhəmiyyətini daha da artırır. Bu imkanlar Türk dövlətlərinin beynəlxalq bazarlara çıxışını asanlaşdırmaqla yanaşı, onların iqtisadi müstəqilliyinin möhkəmlənməsinə də xidmət edir”, – deyə ekspert qeyd edib.
İ.İşbaş vurğulayıb ki, müasir beynəlxalq münasibətlər sistemində enerji təhlükəsizliyi dövlətlərin iqtisadi dayanıqlılığını və siyasi qərarvermə imkanlarını müəyyən edən əsas amillərdən biridir. Bu baxımdan Azərbaycanın etibarlı enerji tərəfdaşı kimi mövqeyi həm region ölkələri, həm də Avropa bazarları üçün xüsusi əhəmiyyət daşıyır.
Ekspertin fikrincə, Azərbaycan ilə Türkiyə arasında enerji sahəsində qurulan əməkdaşlıq Türk dünyasının iqtisadi inteqrasiyası baxımından xüsusi əhəmiyyət kəsb edir. İki ölkəni birləşdirən enerji layihələri yalnız qarşılıqlı iqtisadi maraqlara deyil, həm də daha geniş regional əməkdaşlıq modelinə əsaslanır. Bu əməkdaşlıq digər türk dövlətlərinin də enerji, nəqliyyat, ticarət və investisiya sahələrində ortaq təşəbbüslərə qoşulması üçün əlverişli zəmin yaradır.
Onun sözlərinə görə, qlobal təchizat zəncirlərində baş verən dəyişikliklər və alternativ nəqliyyat marşrutlarına artan tələbat Türk dövlətləri arasında logistika əməkdaşlığının əhəmiyyətini daha da artırır: “Orta Dəhliz Azərbaycan üçün sadəcə tranzit marşrutu deyil, həm də iqtisadi əlaqələrin şaxələndirilməsi, yeni investisiyaların cəlb edilməsi və regional ticarətin genişləndirilməsi vasitəsidir. Dəhlizin səmərəliliyinin artırılması üçün dəmir yollarının, limanların, gömrük-keçid məntəqələrinin və rəqəmsal logistika sistemlərinin uzlaşdırılması vacibdir. Türk dövlətləri bu sahələrdə koordinasiyalı fəaliyyət göstərməklə beynəlxalq nəqliyyat sistemində rəqabətqabiliyyətliliklərini əhəmiyyətli dərəcədə yüksəldə bilərlər”.
İ.İşbaş qeyd edib ki, Türk dünyasının gələcək inkişafı iqtisadi əməkdaşlığın siyasi dialoqla uzlaşdırılmasından da asılıdır. Dövlətlər arasında müntəzəm məsləhətləşmələr, ortaq iqtisadi prioritetlərin müəyyənləşdirilməsi və beynəlxalq platformalarda qarşılıqlı fəaliyyətin gücləndirilməsi regional əməkdaşlığın daha dayanıqlı olmasına şərait yaradır.
Ekspertin qənaətinə görə, Azərbaycanın bu prosesdəki üstünlüklərindən biri enerji, nəqliyyat, ticarət və diplomatiya istiqamətlərinin qarşılıqlı şəkildə tamamlanmasıdır. O vurğulayıb ki, qarşıdakı dövrdə Türk dünyasında iqtisadi inteqrasiyanın daha da dərinləşdirilməsi üçün enerji layihələri ilə yanaşı, sənaye kooperasiyası, rəqəmsal iqtisadiyyat, yaşıl enerji, kənd təsərrüfatı və qarşılıqlı investisiyalar sahələrində də əməkdaşlığın genişləndirilməsi vacibdir.
Bölmənin digər xəbərləri
